Irutxuloko Hitza

Bera Berak oraindik ez du behin betiko erabakirik hartu, eta Fortuna ez da aurkeztuko.

Joan den astean Irutxuloko Hitzak aurreratu zuenez, Etxadi Kirol Elkarteak lehiaketara aurkeztea erabaki du. Orain arte elkarte horrek kudeatu du kirolgunea eta lehiaketari begira, proiektua oso aurreratua du. Hiriko beste bi kirol klubek ere pausoa emango dute: Donostiako Atletikok eta Easok. Donostiako Atletikok gaur egun hiriko bi tokitan ditu instalazioak, Kontxan eta Bera Beran, eta ez du igerilekurik ez batean ez bestean. 2005ean Bera Berako instalazioen ondoko aparkalekuan igerilekua egiteko proiektua jarri zuten mahai gainean, baina azkenean ez zuen aurrera egin.
Easo igeriketa taldea da, eta beraz, haientzat garrantzitsua litzateke igerilekuak izango dituen kirolgunea zuzentzea. Egoitza Paco Yoldi igerilekuetan dute gaur egun. Easo Saskibaloi taldearen eskutik joan nahi du Easo Igeriketa Taldeak lehiaketara. Bera Bera Kirol Elkarteari dagokionez, oraindik ez dute erabaki zehatzik hartu. Lehiaketaren oinarriak aztertzen ari dira, baina baldintzak «nahiko gogorrak» iruditu zaizkiela aurreratu dute. Bera Berak Manteo kiroldegia kudeatzen du 2000. urtetik.
Hiriko beste kirol elkarte nagusienetako bat, Fortuna, ez da egongo Etxadi kudeatzeko lehian. Klubeko iturriek azaldu dutenez, oso harreman ona dute Etxadi Kirol Elkartearekin, oso kontuan hartzen dute klub horrek orain arte egindako lana, eta lehiaketa irabaziz gero hari laguntzeko prest leudeke.