Res Binaria

“Lankidetza Tresnak” izenburupean, talde-lanerako tresna eta prozesu berriei eta enpresarentzat hauen erabilerak ekar dezakeen onurari buruz hitz egingo duen jardunaldia antolatu du Miramon Enpresa Digitalak datorren abenduaren 17rako, 16:00etatik 18:40etara.

Gaur egun «enpresa, gizarte edo edozein taldetan geroz eta garrantzitsuagoa da jakintza sortu eta dagoena egoki baliatzeko bidea emango duen informazioaren kudeaketa egitea». Kudeaketa horretarako behar diren lankidetza tresnak aztertzea da jardunaldi honen helburua.

Hitzaldiak honakoak izango dira:

• “Groupware eta barne partaidetzako tresnak", Aitzol Naberan eta Eneko Astigarraga (CodeSyntax)
• “Lankidetzan, sindikazioan, parte-hartzean, formatu berrietan eta mikroformatuetan oinarritutako informazio-azterketa eta jarraipenerako tresnak", Gorka Julio (Elurnet Informatika Zerbitzuak)
• “Blogak korporazio eta marketin tresna bezala", Sergio Monge
• “Sare sozial korporatiboak eta sare sozial irekien eragina enpresa ingurunean", Jose A. del Moral (Alianzo)

Web 2.0 delako honek dakartzan lankidetza aukeren inguruko jakinmina dugunontzat hitzordu interesgarria izango da. Informazio gehiago Enpresa Digitalaren webgunean.