Irutxuloko Hitza

Futbola

Realak nola edo hala irabazi behar dio gaur Xerezi Anoetan, sailkapenean aurrerapausoa emateko.

xabier lopetegi

Pilotan, tantoak amaitu behar dira. Saskibaloian, aurkariak baino jaurtiketa portzentaje hobea edukitzea oso lagungarria da. Eta futbolean, golak behar dira irabazteko. Pilota edo baloia protagonista duten kirol guzti-guztietan eraginkortasuna da arrakastarako gakoa. Lortutako puntu kopuruak lotura estuago du dohain horrekin, joko onarekin baino.

Sarritan gertatzen da ate aurrean asmatzeko gai ez izanagatik joko erakustaldi bati etekinik ez ateratzea. Realari, aldiz, behin bakarrik gertatu zaio denboraldi honetan, azken jardunaldian Elxeren aurka. Partida horretan erakutsitako armei eutsi, eta errematea gehitu nahi die gaur Xerezen aurka Anoetan, ahal duen neurrian. Orduan bezain ondo berriz jokatuz gero, nekez huts egingo ditu hainbeste aukerak.

Aukerak aprobetxatu

Gol abaguneak aprobetxatu ez ezik, talde eraginkorrek irabazi beharreko partida gehienak irabazten dituzte, eta gaurkoa horien artean dago. Etxean jokatzen du, eta zalantzetan itota dagoen talde baten aurka. Xerezek zazpi puntura du salbazioa, eta bi partida baino ez ditu irabazi etxetik kanpo, horietako bat Elxi. Hori bai, lau gol sartu zizkion. Emaitza horrek erakusten du taldearen izaera: erdibiderik ez dauka, onerako zein txarrerako. Txarrerako gehienetan, baina tarteka arriskutsua da, horretarako baliabiderik ez baitzaizkio falta: Momo, Viqueira, Michel, Antoñito... Lehen Mailan eskarmentua duten jokalariak daude plantillan. Entrenatzaile berriarekin erregulartasuna erdiestea espero dute, baina azken lau partidak jarraian galdu dituzte. Zorteak ere ez die lagundu, eta hain emaitza txarrak ez dituzte merezi izan askotan, Jose Ramon Eizmendiren esanetan.

Aurrerapausoa ematera

Aurkariari erreparatu gabe ere, Reala derrigortuta dago irabaztera. Geratzen diren hamasei jardunalditan puntu batez besteko handia pilatu lortu beharko du igoera ziurttatzeko. Gaurkoa aurrerapausoa emateko aukera aparta da, Sportingek Numantzia hartuko duelako etxean, eta Elxek eta Celtak, bi eta lau puntura dauden bi taldek, hurrenez hurren, elkarren aurka jokatuko dutelako. Beraz, hirugarren postua berreskuratu, edo liderrari aldea kenduko lioke Realak irabaziz gero.

Partida ahal bezain laster bideratzeak mesede handia egingo lioke taldeari. Ez dirudi horrelako egoera batean Xerez buelta emateko gai izango denik. Las Palmasen aurkako partida erreferentzia baliogarria da zentzu horretan: Realak nahiko azkar sartu zuen gola, eta besteak ia inertziaz etorri ziren bigarren zatian, aparteko jokorik egin gabe.

Eizmendik Colemanek lortu ez zuena lortu du: hamaikako on bat topatu eta jarraipena ematea. Jakina, galestarrak baino baliabide hobeak ere badauzka esku artean. Elxen ikusi zen behar bezala arituz gero Bigarren Mailan nagusitzeko moduko taldea duela Realak: defentsa sendoa, oreka eta sormena euskarrian, hegal erasokorrak, eta mugimendu arriskutsuak dauzkaten bi aurrelari. Beraz, ez dirudi aldaketarik izango denik.

Deialdian, aldiz, Vaughan ez da izango. Erdilariaren egoera fisikoa korapilatu egin da berriz: mina sumatu arren, ebakuntza egiteko beharrik ez du ikusten berak. Klubaren iritzia, antza, bestelakoa da. Ikusi beharko da zertan gelditzen den kontua. Haren ordez, Uranga sartu da deialdian, azken jardunaldietan ez bezala. Osbaleko pizgarria izan daiteke aulkitik sartuta.