Irutxuloko Hitza

Bertsoak, animaliak eta jendetza izan dira hutsik gabe Aingeru Goardakoaren egunean parte hartu dutenak. Euriaren arriskuak ez zuen erromeria zapuztu.

Eguraldi ilunak ez zuen Aingeru Goardakoaren ermitako jai eguna zapuztu, jendez gainezka zegoen baselizaren inguruko zabalgunea hamabiak aldera.

Ordu horretarako txorixo eta haragi pintxoak bukatuta zeuden. «Beste urteetan baino lehenago bukatu dira jatekoak jende asko hurbildu delako eta gaur mezarik ez delako egon» azaldu zuen Juanjok. Goizean goizetik aritu ziren antolatzaileak lanean den-dena ondo irten zedin. «Goizeko zazpietan Igarako Aingeru elkartean nengoen salda prestatzen hasteko» gehitu zuen juanjok kanilla ireki eta baso bat saldaz betetzen ari zela.

Haurren gozagarri den Gorriti Show-a zorrotz hasi zen, eta hobe horrela, haurrak animaliak ikusteko eta eurekin jolasteko irrikitan baitzeuden. Gurasoak ordea, argazki kamerak hartuta haurrak ikusteko zain.

Primerako bertsolariak

Aingeru Guardakoaren errmitan urtero egoten dira bertsolariak. Antolatzaileek ziotenez, «lehen mailako bertsolariak etorri dira aurten ere, eta gainera gustatu egiten zaie hona etortzea». Horrela da ezbairik gabe, bertsolari ezagunak izan ziren Igarako baselizan. Andoni Egaña eta Sebastian Lizasorekin batera Gaztelumendi anaiak aritu baitziren.

Igandero meza eskatuz

Bertsolarien jardunarekin batera beste bi gai izan ziren nagusi: eguraldia lehena, «otsaila osoan euririk ez, eta hain justu gaur hasi behar?» zioen Antiguatik oinez euritakorik gabe iritsitako emakumeak. Bestea, berriz, mezaren orduan gertatutakoa.

Abenduan utzi zioten ermitan igandero meza egiteari Espiritu Santu elizako apaizak hala aginduta eta astero joan ohi zirenen haserrea eraginda. Atzo, berriz, Igarako erretoreak meza eman gabe alde eg in behar izan zuen jendeak txistu eta errieta egiten ziolako. «Gure eskaera hemen igandero meza entzutea da» esaten zuen Karmenek sinadurak biltzeko orriari seinalatuz. Gotzaiari bidaltzeko 200 bat sinadura bildu zituzten eguerdia baino lehenago. Aingeru Goardakoaren egunean ermitaraino igotzen direnek opilak faltan sentitu zituzten aurreko bi urteetan «Duela bi urte elurrak eta iaz gaixotasunak etxean geldiarazi gintuzten» esan zuen Manuelek, «baina asko gustatzen zaigunez, aurten ere etorri gara».