Irutxuloko Hitza

«Bikoteren batek kale egiten badu, haserretu egiten naiz»

Santi Asumendi:- Mus txapelketaren antolatzailea

Sorreratik arduratzen da Asumendi txapelketa antolatzeaz.

r. perez

Santi Asumendi (Herrera, 1939) da Euskal Giroa elkartearen mus txapelketaren bihotza eta arima. Egunero egunero elkartean izaten da partidak hasten direnetik bukatu arte. «Etxean badakite hilabete eta erdiz ia ez nautela ikusiko», dio barrez.

Zaila al da txapelketa antolatzea?

Kosta egiten da. Txapelketa hasi baino hilabete lehenago dena prestatzen hasten naiz. Bikoteek izena eman beharrean, neronek deitzen diet zuzenean aurreko urteetan aritutakoei eta gehienek baizkoa ematen didate. Hala ere, urtero izaten da lehen aldiz parte hartzen duen bikoterik.

Noiztik zabiltza antolatzaile?

Hasieratik, hau da, duela 26 urtetik. Elkartearen zuzendaritzak mus txapelketa antolatzea erabaki zuen. Nik hartu nuen txapelketa antolatzeko ardura, eta horrela jarraitzen dut. Jarraipena ematea zen hasierako helburua, baina ez genuen uste horrenbeste jendek parte hartuko zuenik. 100dik gora bikote izan ditugu urte batzuetan eta aurten, 84.

Txapelketak irauten duen bitartean egunero izaten al zara elkartean?

Bai. 18:30 aldera etortzen naiz eta etxera 23:00 arte ez naiz iristen. Batzuetan hemen bertan afaltzen dut. Serio hartzen dut lana eta bikote bat ez denean etortzen haserretzen naiz. Hala ere, aitortu behar dut, salbuespenak salbuespen, inork ez duela arazorik sortzen.

Antolatu bai, baina jokatu izan al duzu inoiz txapelketan?

Parte hartu ohi dut, baina ez dut sekula irabazi. Joan den urtean laugarren sailkatu ginen. Gurean jokatzen dutenak ez dira nolanahikoak!