Irutxuloko Hitza

Ekaitza

Suhiltzaileek hogei irteeratik gora egin dituzte haizeak hainbat auzotan eragindako kalteak konpontzeko.

erredakzioa

Haizeak eta kazkabarrak nahi baino buruhauste gehiago eragin ditu hirian. Ugariak izan dira kalteak eta suhiltzaileek hogei irteera baino gehiago egin zituzten atzo. Irteera guztietan larriena, ordea, Zorroaga pasealekuan gertatu zen atzo 15:30ak aldera. Zuhaitz bat errepide erdira erori eta bete betean jo zuen motorzale bat. Kolpearen ondorioz, 40 urteko gizonezkoa bat-batean hil zen. Haizearen indarrez zuhaitza Zorroaga pasealekuako errepidera erori zen eta bi motorzale jo zituen, bata Amarara bidean eta bestea Loiolara bidean zihoazen.

Amara aldera zihoan 40 urteko motorzalearen gainera erori zen zuhaitza eta bertan gelditu zen motorzalea hilik. Loiolara zihoan motorzalea lurrera bota zuen zuhaitzak baina ez du larritzeko zauririk.

Haizeak ere bestelako ezustekoak eragin zituen. Erregezainen kaleko aldamio bat, esaterako, bere lekutik atera zuen. Bidea itxi zuten baina ez zuen aparteko kalterik sortu. Haizeak edukiontzi, teila eta bestelakoak bere lekutik atera zituen atzo. Hirian aparkatuta zeuden hainbat motor lurrera bota eta kaltetu zituen ere.

Erdialdean ere Andia kaleko aldamio batean jarritako iragarki kartel batek ere lanak eman zizkien suhiltzaileei. «Haizeak kartela bela oihalean bihurtu eta aldamioa bultzatzen zuen etengabe; horrenbestez, kartela apurtu behar izan genuen», azaldu du Imanol Andonegi suhiltzaileak.

Hauek eta beste hainbat kalte eragin ditu haizeak. Haizeteari dagokionez, egoera baretu egingo da baina hotz handia egingo du gaur eta datozen egunotan.