Irutxuloko Hitza

Futbola

Reala «historiako krisialdirik handiena» gainditzen ari dela esan du presidenteak.

erredakzioa

Iñaki Badiolak bi hilabete daramatza Reala zuzentzen eta orain arte egindakoaz hitz egin du. Poz pozik agertu da Badiola. «Realaren gertuko historiaren 60 egun onenak pasatu ditugu. Igotzeko puntuetan gaude eta proiektuaren helburu nagusia inoiz baino gertuago dago. Gozatzen ari gara, gainera. Harro gaude zaleek eta Anoetak ilusioa berreskuratu dutelako».

Egiten ari diren kontu ikuskaritza berezia, Due Dilligence, ere izan du ahotan Realeko presidenteak. «Gure Realaren historiako krisi handiena gainditzen ari gara. Hartara, Reala gardentasunez iritsi ahal izango da mendeurrenera». Kontu ikuskaritza «lan gogorra, deserosoa eta tristea» da, Badiolaren hitzetan.

Badiolak nabarmendu du ez dutela atsedenik hartuko Lehen Mailara igo arte eta «klubaren prestigioa berreskuratu arte». Akziodunen, abonatuen eta zaleen babesak lanean jarraitzeko indarra ematen diela esan du Badiolak.

Akordioa Sogecablerekin

Bestalde, Realak jakinarai du Sogecable telebista plataformarekin enpresarekin zuten auzia konpondu egin dutela. Horrek Realaren norgehiagoka gehiago telebistaz ematea ahalbidetuko du eta talde txuri-urdinak dirua jasoko du.

Bi denda, Txinan

Olinpiar Jokoak hasi baino lehen jarriko ditu Realak bere bi dendak Txinan. Realaren webgunean aditzera eman dutenez, aipatu dendak Beijingo aireportuko terminal berrian jarriko dituzte eta urtea bukatu baino lehen 76 milioi pertsona pasatuko direla uste dute. Bi denda hauetan Realeko 194 produktu egongo dira salgai; Badiolak presidentetzarako hautagai zenean Txinatik diru sarrerak etorriko zirela agindu zuen eta horren harira ireki nahi dituzte bi dendon Beijinen.

Abuztuaren 8an hasiko dira Olinpiar Jokoak. Hori dela eta, joan den astean Beijingo aireportuak terminal berria inauguratu zuen. Olinpiar Jokoetan Beijingek milioi erdi bisitari jasoko dituela uste dute.