Irutxuloko Hitza

Suhiltzaileak

Martxan dira suhiltzaileek Garbera ondoan izango duten egoitza berriaren lanak, 2009an bukatuko dituzte.

xabier etxabe

San Sebastian egunean Salamanka pasealekuko etxebizitza batetan gertatutako sua, urriaren 12ko istiluak... Guztira, 2019 ezbehar eta suteetan hartu zuten parte iaz suhiltzaileek. Suteak, denera, 694 izan ziren 2007an. Suak itzaltzen baino, herritarren bestelako arazoak konpontzen pasa dituzte suhiltzaileek urteko 365 egunak. Herritarrei etxean sartzen laguntzeko eta antzeko zerbitzuetarako 895 irteera egin zituzten suhiltzaileek iaz.

Irteera kopuruak %7,39 egin du gora

2019 irteera egin zituzten iaz suhiltzaileek, 2006an baino %7,39 gehiago. Bataz beste, egunean sei irteera. Hiru, herritarren arazo txikiak konpontzeko, bi suteak itzaltzeko eta beste bat erreskate lanetarako.

Honenbestez, etxean sartzen laguntzea eta bestelako arazo txikiak konpontzea dira suhiltzaileen ardura nagusiak, %44. Irteera guztien artean, suteak itzaltzea %34 eta erreskateak %18. 2007a, ordea, ez da irteera gehien zenbatu dituzten urtea. 2005ean 2088 irteera egin zituzten eta azken zortzi urteetako urterik lanpetuenetakoa izan zen suhiltzaileentzat.

Egoitza berriko lanak martxan

Suhiltzaileen lana ahalik eta eraginkorrena izan dadin, bi ibilgailu erosi dituzte: elurra kentzeko furgoneta bat eta eskailera mekaniko bat erosi zuten iaz, 616.360 euro inbertituz.

Aurtengo inbertsiorik sendoena, berriz, suhiltzaileen egoitza berrian egingo dute. «Garbera egoitza eraikitzeko lurrak mugitzen hasi dira jada eta egoitza berrirako lanak hurrengo urterako bukatuta egongo dira», aipatu du Ernesto Gasco Mugikortasun zinegotziak. Garberatik hirira eta Donostialdeko gainontzeko herrietara zerbitzua «azkarragoa» izango dela ziurtatu du Gascok. Iaz, 3 eta 13 minutu artean behar zuten suhiltzaileek larrialdietara iristeko.

Kamioi berriak aurten

Suhiltzaileen zerbitzua egunetik egunera hobea izan dadin aurten ibilgailu berriak erosiko dituzte. Ibilgailu horien funtzioa produktu kutsakor eta arriskutsuekin lan egiten duten enpresetan gertatzen diren ezbeharrei erantzutea izango da.