Irutxuloko Hitza

Espainiako hauteskundeak

PSE-EEk 37.854 boto lortu ditu hirian, gainontzeko alderdi guztiak jaitsi egin dira duela lau urteko hauteskundeekin alderatuta abstentzioak gora egin du.

erredakzioa

Donostian irabazle garbia izan zen igandeko hauteskunde egunean. PSE-EEk argi eta garbi irabazi ditu hauteskundeak hirian eta lehenengo indar politiko gisa nabarmendu da. Orain arte, alde handia izaten zen udal hautesekundeen eta beste hauteskundeen artean botoa emateko garaian. Hala ere, igandeko hauteskundeetan argi eta garbi ikusi da badagoela boto-emaile kopuru handia hauteskundetik hauteskundera bere botoa aldatzen duena.

Hautes kanpainan eta, batez ere, igande gaueko hauteskundeetan bipolarizazioa hitza salatu dute Espainiako bi alderdi handiak ez diren alderdi guztiek. Emaitzak ikusita, bipolarizazio hori nabarmena izan da Donostian. PSE-EEk botoen %40,33 lortu du. Sekulako emaitza lortu dute sozialistek Donostian. Duela lau urte baino 8.294 boto gehiago jaso dituzte PSE-EEkokideek.

Bigarren alderdi bozkatuena PP izan da 19.935 botoekin eta %21,24arekin. Hauteslego fidela duela nabarmendu du PPk hauteskundeetan zehar. Hala ere, aurten beherakada izan du gainontzeko alderdi gehienek bezala. duela lau urte 22.877 boto izan zituen eta aurten 19.935; hau da, ia hiru mila bozka gutxiago.

Alderdi abertzaleen emaitza txarrak

EAJ izan da hirugarren alderdia hirian 16.178 botorekin. Hala ere , jeltzaleek beherakada handia izan dute 2004ko Espainiako hauteskundeekin alderatuta. Ia bederatzi mila boto galdu ditu EAJk Donostian.

Eusko Alkartasunak 4.283 boto galdu ditu duela lau urteko zitarekin alderatuta. Hautestontzien zenbaketa ez zen batere onuragarria izan EArentzat. Madrilen zuten parlamentari bakarra galtzea izan zen ondorio txarrena, baina boto galera handia izan dute.

Aralarrek ere botoak galdu ditu igande honetako deialdian. Hala ere, hauteslego nahiko fidela lortu duela erakutsi du eta duela lau urte baino 400 boto gutxiago lortu ditu soilik.

Ezker Batua oraingo honetan ez da Aralarren eskutik aurkeztu Espainiako hauteskundeetara. Espainian sekulako jipoia jaso badute, hirian ere zituzten ia botoen erdiak galdu dituzte. 2004ean 8.082 lortu zituzten eta igandean 4.267 botoetan gelditu ziren.

Alderdi berrien botoak

Jasotako boto kopuruari begiratzen badiogu, Aralarren ondoren Fernando Savater eta Rosa Diezen Unidad Progreso y Democracia alderdia azaltzen da. Askok uste zutena baino emaitza hobeak izan dituzte Espainian, diputatu bat izango baitute. Donostian 1.474 boto jaso ditu alderdi horrek hauteskundeetara aurkeztu den lehenengo aldian.

Elorzaren erreakzioa

Pozik baina era berean zuhur azaldu zen Odon Elorza alkatea atzo, igandeko emaitzen balorazioa egiterakoan. Hausnarketarako garaia heldu dela esan zuen alkateak. Bereziki EAJrenatzat izan zituen hitzak eta jeltzaleek bereziki egin behar dutela gogoeta esan zuen: «Denek hausnartu beharko dugu haustenkundeek utzitako emaitzekin. Oso larria da lehendakariarentzat eta EAJrentzat, ez dituztelako aurreikusitako emaitzak jaso. Estrategia krisi sakon batean dago murgilduta EAJ».

Abstentzioak %10 egin du gora

Ezker abertzaleak abstentziora deitu zuen eta hirian badirudi eragina izan duela dei horrek. Beti abstentzioaren kalkulatzea zaila bada ere, duela lau urte baino %10 handiagoa izan da.

Ezker abertzaleko kideak pozik azaldu dira abstentzioaren kopuruarekin.