Irutxuloko Hitza

Ikerketa

Sustapen Elkarteak bere gain hartuko ditu eraikuntza gastuak; 8,1 milioi aurreikusi dituzte ikerlarien egoitza egiteko.

x. etxabe

Mirakontxan, Rozanes jauregia bota zuten lekuan, ikerlarientzat 80 apartamentu egingo dituzte. Eraikinak hiru solairu izango ditu eta Odon Elorza alkateak egin dituen aurreikuspenen arabera, lanak udazkenean has daitezke. 18-20 hilabete artean lanak amaituta egon daitezkeela uste dute.

Hasiera batean, Eusko Jaurlaritzak bere gain hartuko zituen ikerlarientzako egoitzaren gastuak, Udalak, ordea, lehenbailehen hasi nahi ditu eraikuntza lanak eta horretarako Sustapen elkarteak ordainduko ditu eraikuntzaren gastuak. Alkateak zehaztu duenez, «Gipuzkoako Foru Aldundiari Rozaneseko proiektuaren berri eman diogu eta diruz laguntzea espero dugu». Espainiako Gobernuak ere ikerlarien egoitza finantzatzen lagunduko du.

52 eta 65 metro karratu arteko apartamentuak

Euskal Herriko Unibertsitateak sei ikerketa lan talde ditu eta hiriko ikerketa guneek hirutik zazpira egin dute gora azken zortzi urteetan. Ikerlarien joan etorriari erantzuteko «beharrezkotzat» jo dute 80 apartamentutako egoitza hau.

52 eta 65 metro karratu arteko apartamentuak izango dira eta ikerkelariek 12-18 hilabete arteko tartean egon ahal izango dute ikerlariek egoitzan. Egonaldia merkatu prezioa baino merkeagoa izango da.