Irutxuloko Hitza

Bi egunez itxita egon eta gero Bretxako postu gehienak normaltasun egoerara itzultzen ari dira, merkatuko gerentziaren eta osasun arduradunen oniritziaz.

Bretxako merkatua zabalik berriro

Mikel Goñi

Bi eguneko eten behartuaren ondoren normaltasun itxura hartzen ari zen atzo goizean Bretxako merkatua. Konponketa lan handienak eginak eta garbiketa bukatu ondoren publikoarentzat lanean hasi dira azokako postu gehienak.

Hainbat lan bukatu beharko dituzte datozen egunetan. Besteak beste, merkatura jaisteko eskailera mekanikoak eta igogailua matxuratuta zeuden atzo eguerdian eta martxan noiz jarriko ziren ezin zuten zehaztu langileek. Bertan dagoen supermerkatuko langileek arazoak izan zituzten, iragarri bezala, eguerdian irekitzeko eta honenbestez zabaltzea atzeratu zen.

Bestalde beheko sotoan egin beharreko lanek ere luze joko dutela aurrikusten dute postuetako jabeek. Baina, era berean, osasun berme guztiak dituztela eta alorreko agintaritzaren «argi berdea» gaineratu nahi izan dute.

Genero asko alperrik galdurik

Postu batzuetan makineria elektrikoa matxuratu bada ere, galera nagusia alperrik galdu den generoa izan da. Lourdes Zorrozua arrain saltzaileak hozkailuetan zeukan genero guztia galdu du «asko ere ez geneukan egunean egunekoa ibiltzen baitugu, baina den dena bota behar izan dugu». «Hala ere, asko galdu dutenak fruta saltzaileak dira» gaineratu zuen «beraiek lurrean zuzenean gordetzen baitituzte fruta kaxak».

Baina gehien galdu dutenak beheko soilaruan sotoak eta hozkailuak zituztenak dira han izan baitzuen uholdeak eraginik handiena.

Galerak ere erabilitako hozkailu motaren araberakoa izan da Ramoni Izagirreren ustetan eta adierazi zuenez «goiko aldean motorea duten hozkailuak ez dira hondatu» . Izagirreren harategian hainbat gauza bota egin behar izan zituzten, «saltxitxak eta abarrekoak, horiek itxita egon garen egunetan txartu egin direlako». Bestalde pieza haragia zatitu gabe zeukatenez, ez dute arazo handirik izan «bestela, hori haragi mordoa bota beharko genukeena!»

Bezeroen elkartasuna

Jose Angel Oses harakinak ez du gehiegi galdu uholdearen ondorioz «120 bat euro, izan ere, ni erretiroa hartzekotan nabil eta ez dut genero gehiegi hemen». Eskailerak eta igogailua lehenbailehen konpontzea espero du Osesek «adineko jende askorekin egiten dugulako lan. Ni neu lauzpabost alditan igo naiz eta leher eginda nago».

Bestalde, saltzaileen arteko elkarrizketetan jendeak «egun batzuetan bada ere» supermerkatu handietara ez joateko desioa entzun zitekeen. Zorrozuak esaten zuen moduan jendeak «interes handia erakutsi du. Niri, esterako, telefono zenbakia ezagutzen duten bezeroek deitu egin didate».