Irutxuloko Hitza

Gironako Salt hiriko Colla Marrecs castellers taldeak ikuskizun harrigarria eskaini du Antiguan.

Antigua auzoko Gaskoniaplaza gainezka zegoen igandean giza gazteluen ikuskizunaren zain. Euskal Herria eta Katalunia Herrien arteko topaketaren barruan Antiguako jai batzordeak eta Antiguotarra elkarteak antolatutako ekintzetan ziurrenik erakargarriena izan zen Salt hiriko Colla Marrecs-ek eskainitakoa. Bertaratu ziren 800 bat lagunek miresmen eta harriduraz jarraitu zituzten 150 kideek eraikitako lau dorreak. Oso zaila da horrelako emanaldiak gurean ikustea.

Giza-gazteluko kideek seriotasun eta tentsio handia islatzen zuten. Nagusi zen isiltasunaren artean ikuskizuna irrikaz jarraitzen zutenen txundidura ahots batzuk bakarrik entzun zitezkeen. Dorrearen oinarria osatzen duen jende multzoa taldearen 110 bat kidek osatzen zuten, baina ikusle soil izateari utzi eta festan zuzenean parte hartzeko bat egin zutenak ere izan ziren.

Dorre bakoitza egiteko bost bat minutu behar izan zuten. Erakustaldiko dorre zailena ezik. Lau laguneko zazpi mailakoa barnean lau pertsonek osatutako zutabea duena, hirugarren saiakera erdietsi zuten. Eraketa ikuskatzen duten bi lagunek, oinarrian bata eta gazteluaren bigarren mailan bestea, alde guztiak berdinak zirela ziurtatu arte ez zuten aurrera jarraitu. Baina horrek ez zuen bertaratutakoen iritzi ona aldatu.

Jai batzordeko Jon Martinez Txiki-ren telefonoak etengabe jo zuen atzo. «Jendea zur eta lur gelditu zen eta asko dira gaur eskerrak eman eta oso gustoko izan zutela esateko deitzen dutenak».