Irutxuloko Hitza

Politika

Manos Limpiasek Udala salatu du udaletxeko aurrealdean ez dagoelako Espainiako bandera zintzilik.

erredakzioa

Udal Gobernuak erabakiko du Espainiako bandera udaletxetik zintzilik jarriko duen ala ez. Manos Limpias elkarteak epaitegietara, administrazioarekiko auzietako epaitegira, jo du Odon Elorza alkatea salatzeko. Elkarte honen arabera, Elorzak «egungo legea urratu du, legeak Espainiako bandera udaletxean agerian egon behar duelako zintzilik». Manos Limpiasekoek aipatu dutenez, behin eta berriz jo dute alkatearengana Espainiako bandera jartzeko baina honek «uko egin du».

2007ko urriaren 22an PPk proposamena aurkeztu zuen. Udal taldeetako bozeramaileek proposamena aztertu eta gero, Espainiako bandera udaletxeko aurrealdean jarri gabe jarriatzen du. Manos Limpiasek apirilaren 16an beste saiakera bat egin zuen, honek ere ez zuela arrakastarik izan zehaztu dute Manos Limpiaseko kideek.

Odon Elorza alkateak Manos Limpiasekoek epailearengana jo eta helegitearen berri izan zuenean, Espainiako banderaren auziari amaiera emateko erabakia Gobernu Batzordeak hartuko duela esan du. Udaleko edozein erabaki hartzeko prozesua jarraitu nahi du Odon Elorzak.

Espainiako banderaren auzia, «gai korapilatsua» dela azaldu du alkateak eta Bilbon, Iñaki Azkuna alkateari gertatutakoa ekarri du gogora. Izan ere, EAEko Justizia Auzitegi Nagusiak Bilboko udaletxetik Espainiako bandera zintzilikatzera behartu zuen Iñaki Azkuna.