Irutxuloko Hitza

niko etxart ð- Musikaria

Musika

Niko Etxart, bere aita, Dominika, eta bere koinatuarekin, Robert Larrandaburu, izango da Lagunekin kantari ekimenean bihar Larrotxene kultur etxean.

nerea lizarralde

Zuberoako kanta-modu bereziaren erakusle nabarmenak dira Etxart-Larrandaburutarrak.

Zer iruditzen zaizu Lagunekin Kantari ekimena?

Pentsatzen dut gero eta haboro holako ekimenak egin behar direla, telebistari bai eta gizarte estresante honi ihes egiteko. Ene ustez helburua ez da iraganeko giro idiliko baten artifizialki arrasortzea, bena bai modu aktibo batean bakotxak bere ahalekin gure kanta xaramela ederra sinpleki kantatzea.

Nolakoa izango da emanaldia?

Lehen partean hiruak elkarrekin, biazka eta nola ez bakarka ere ariko gara. Bigarren partean gure entzuleen artean egonen gira leheneko ostatu giro batean bezalaxe aritzeko denek, prefosta hautatu dutugun kantore parrastot bat nahi duanarekin kantatzeko!

Eta errepertorioa?

Gure Eperra izenburua duan azken CDko kantore zonbait, Xiberoko kantore zahar elibat, guhaurk eginiko kantore eta Ligetxe, Attuli edo bi Etxahunen kobla zonbait ere eskainiko dutugu.

'Eperra' bezalako abestiek kantuan jartzen al ditu oraindik Euskal Herriko plazak?

1974etik aitzina Eperra kantatzen dut plazaz plaza, ene rock kontzertuetan edo aita eta Robertekin leheneko artzainen maneran betiko arrakasta lortzez. Musikaturik grabatu nuan lehen aldikoz 1979an eta duela 4 urte, 2004ean, aita Dominika eta Robertekin a capella. Jadanik bide luzea egin du kantu honek eta ez da dudarik jendea jartzen diala kantan!

Intxaurrondon egongo zarete bihar. Antiguako jaietan izan zineten urte hasieran. Korrikaren harira berriz, Antzoki Zaharrean, iaz. Nolako esperientziak izan dira?

Ja, hiru urte segidan Antiguan kantatzen dugula eta gustora jiten gira, jakitez giro bero eta kartsu bat bertan izanen dela. Publikoak gurekin bat egiten du eta ez da otoiztu behar gurekin ari ditean kantan. Lehen aldean bereziki hunkigarria izan zen eta uduri zuan Larrañen ginela kantan. Bestaldi batez ere nolako ezustekoa ene aita eta donostiar gazte batek algarrekin kantan entzutea. Gainera nik eta Robertek sekula ikasi ez dutugun kantoreak ene aitarekin ederki kantatzen hitzez hitz. Antzoki Zaharrekoa osoki bestelakoa izan zen, hor Anje Duhaldekin partekatzen nialako taulada.

Sasoitsu al daude euskal kantu ekitaldiak? Zer xarma dute?

Euskal Herria zabala da eta guneka edo zonaka orokorki jendeen erantzuna guziz diferente izaten da; Iparraldean erdaldun publikoak euskal kantua gozatzen du ere, aldiz hegoaldean ez da batere berdin. Euskal kulturaren Ghetto fenomenoa nabariago da dudarik gabe Hegoaldean. Gure kasuan uste dut modan girela kantuzaleentako eta exotiko samar besteentako.

Mixel Etxekopar-ek honakoa dio: «Ipar Euskal Herrian txinparta txiki bat aski da kantuaren sua pizteko».

Guziz ados naiz Mixel adiskidearekin, hala da oraino ere Baxenabarren eta Xiberoan, baina aldi honetan, Intxaurrondon, izan gaitezen gu kantua piztuko duen txinparta hori!