Irutxuloko Hitza

Altza

Lanak bukatu dituzte eta ekaina hasieran zabalduko dute; sukalde berria dute eta elkartea informatizatu dute.

r. perez

Altzako Gurea elkartea handitu egin dute. Ondoko lokala erosi du elkarteak eta horri esker 80 metro karratu gehiago izango ditu hemendik aurrera.

Ekainean inaugurazio ofiziala egiteko asmoa dute elkarteko kideek. Dena dela, asteburu honetan bertan izango da mugimendua Errotetako elkartean. Izan ere, ostiralean bazkideentzako barrikotea egingo dute eta larunbatean zikloturista talde beterano batek bapo bazkaldu ahal izango du elkartean 115 kilometroko ibilaldia egin eta gero.

WI-FI eta guzti

Gurea elkartea 1977an eratu zuten eta 2006ko hasieran erosi zuen ondoko lokala ¬eliza ebangelistarena zen¬ eta joan den urtearen azaroan ekin zieten handitze lanei. Joaquin Luhia elkarteko kideak esan du askoz erosoago egongo ahal izango direla elkartean. Sukalde berria jarri dute eta elkartea informatizatu dute; besteak beste sarraila elektronikoa izango du elkarteak eta WI-FI-a ere jarri nahi dute, haririk erabili gabe Interneten nabigatzeko.

Elkartea zabaldu badute ere, ez dute bazkide gehiago hartzeko asmorik. Orain elkarteak 125 bazkide ditu, haietako 15 erretiratuta.

Zaharrentzako bazkaria buruan

Elkartea inauguratu osteko lehen jarduerak zeintzuk izango diren erabaki dute. Hala, udal ordezkariekin egingo dute inaugurazio bazkaria. Bestalde, senidetasun bazkaria ere egingo dute ekainaren bukaera inguruan. Urtero, bestalde, martxoa inguruan Altzako zaharrentzako bazkaria antolatu ohi du Gureak. Aurten obrengatik bertan behera utzi behar izan dute, baina elkartea zabaldu bezain laster helduko diote bazkari horri. «Adinduak gogotsu dabiltza bazkaria noiz egingo zain», esan du Joaquin Luhiak.