Irutxuloko Hitza

Musika

Larunbatean Santa Maria Basilikan eta hurrengo astelehenean EHUko gelategian izango da Donosti Ereski abesbatza Norvegiako abeslariekin.

nerea lizarralde

Norvegia eta Euskal Herriko hainbat abesbatzek bat egingo dute hurrengo egunetan. Antolatzailea Donosti Ereski Abesbatza izan da. Bertako kideek argi daukate beraiena kantuan aritzea dela. Hala eta guztiz ere, urtean zehar egiten dituzten emanaldiak osatzeko kultur jarduerak antolatzen animatu dira.

Norvegia eta Euskal Herriaren arteko elkartrukea

Norvegiako Abildso Bygdekor abesbatzarekin egin duten elkartrukea zenbait emenaldi eta mintegirekin borobilduko dute. Hurrengo udan, Norvegian zehar bira egitea espero dute. Iaz ekin zioten mota honetako kultur jardunaldiak antolatzeari eta aurten ere ekimenarekin jarraitzea erabaki dute. Pirinioen inguruko jardunaldiak prestatu zituzten iaz eta harrera bikaina izan zuten.

Migel Zeberio Donosti Ereskiko zuzendariaren ustez jardunaldiok oso bereziak dira: «Ez dira ohiko emanaldi klasiko serioak. Nahiko eklektikoak eta bitxiak dira. Musika klasikoa desdramatizatu nahi dugu nolabait. Ohiko publikoaz gain entzule berriak erakarri nahi ditugu jardunaldi hauen bidez».

Bygdekor, Donosti Ereski, Eskifaia eta Laskorain abesbatzak, Et Incarnatus orkestra, Gerardo Rifon organo jolea eta Martin Dahl eta Sivano Baztan bakarlariak. Horiek guztiek parte hartuko dute larunbat honetan Santa Maria basilikan egingo den emanaldian. Hurrengo kontzertua EHUko gelategiko eskaileretan izango da, maiatzaren 12an, astelehena. Abesteaz gain, euskarazko eta norvegierazko olerkiak ere irakurriko dituzte. Berezia izango da Aquariumean prestatu duten jarduera. Vikingoak eta Euskal Herria izenpean, proiekzioak, solasaldiak eta Donosti Ereskiko haurren emanaldia izango da. Miguel Zeberiok azaldu du «Norvegiako abesbatzakoak oso jatorrak eta oso dibertigarriak dira. Asko bidaiatu dute eta ziur naiz emanaldi izugarriak izango direla».