Irutxuloko Hitza

Hirigintza

Txurruka kalean berritzen ari diren etxebizitza eta zahar etxeko lanen arteko gorabeherak eragiten ari dira atzerapena.

xabier etxabe

Idiakez kalean dagoen zahar etxea barrutik hustu eta berritzen ari dira. Txurruka kalean ere etxebizitza berria egiten ari dira eta etxebizitza bateko eta besteko atzealdeek bat egiten dute. Atzealdea berritzeko bi aldeek dituzten gora beheren ondorioz, zahar etxea berritze lanak atzeratu egingo direla esan du Susana Garcia Chueca Ongizate zinegotziak.

Idiakezeko zahar etxearen eta Txurruka kaleko etxebizitzaren atzealdean doazen argi eta aireztapen bideak non jarri zehaztu behar dute, besteak beste, eta ados jartzeko zailtasunak dituztela esan du Ongizate zinegotziak. Bi aldeen artean bat egiteko arazoengatik, lanak bukatzeko aurreikusitako zazpi hilabeteak ez dira nahikoak izango. Hortaz, zaila izango da Idiakez kaleko zahar etxea udazkenerako zabalik egotea.

Zahar etxea berritzeko Udalak 530.750 euro bideratu ditu. Aurrekontu horrekin lau solairuak lotzeko igogailua eraikiko dute. Adinekoek zahar etxean sartzeko arazorik izan ez dezaten sarreretan arrapalak egingo dituzte eta neguan hotzik pasa ez dezaten, berogailu sistema berria jarriko dute.

Martxa onean doaz Aieteko zahar etxeko lanak

Idiakez kaleko zahar etxeko obrak ez bezala, Aieteko zahar etxeko lanak martxa onean doazela adierazi du Susana Garcia Chuecak. Aurreikuspenak betetzen badira, uztailetik aurrera itxura berria izango du zahar etxearen, Lantxabe Auzo Elkartearen eta Gurutzeaga abesbatzaren egoitza den Topalekua.

Uztailerako dotore egongo da -Aieteko parkeko eraikin honen kanpoaldea zein barrualdea. Kanpoaldean, etxaurrea guztiz eraberrituko dute, «jatorrizko kolore eta diseinura itzuliz», esan du Chuecak. Barrualdeari dagokionez, igogailua jarri, sukalde berria egin, komunak aldatu eta bilera gela egokituko dute, besteak beste.