Irutxuloko Hitza

M usika

Bihar Kursaalen 24 klarinete ezberdin erabiliko dituzte Salmoeko hiru kideek familia osoari eskainitako ikuskizunean.

erredakzioa

Carles Riera, Emilio Ferrando eta Albert Gumik Salmoe hirukotea osatzen dute. 24 kidek osatzen duten klarinetearen familia zabalaren berri emango dute modu erraz eta dibertigarrian. Izan ere, biharko musika emanaldia Kursaal Fundazioaren Musika Familian egitarauaren barruko saioa da. Helburua, familien eta musika klasikoaren arteko harremana estutzea da. Salmoe hirukoteak eskainiko duen kontzertua Udalaren Musika eta Dantza Eskolarekin elkarlanean antolatu du Fundazioak.

Klarineteen familia zabala

Klarineteen aitzindari diren chameaux-etatik hasi eta klarinete handi eta modernoetaraino, banan-bana guztien ezagugarriak azalduko dituzte musikariek. 1993an sortutako taldearen izenak ere lotura handia du musika tresna honekin, klarinetearen aitzindari baten izen italiarra baita Salmoe. Umoreak eta goi mailako musikak bat egingo dute guraso eta seme-alabentzako saio honetan.

Carles Riera, ibilbide luzeko klarinetejolea

Salmoeko Carles Riera 40tik gora klarinete historiko eta garaikidez osatutako bildumaren jabe da. Riera klarinete jole aitzindaria da gainera klarinete historikoen inguruko dokumentazioa eta informazioa zabaltzen.

Ganbera musika jo ohi du Carles Rierak. Orkestrarako musika ere interpretatu izan du eta bakarlari bezala ere aritu da hainbat aretotan, Sidneyko Opera, Londreseko Queen Elizabeth Hallean, Amsterdameko Concertgebown edo Pariseko Theatre des Champs Eliseesen, besteak beste.

The English Concert, Europa Galante, Orquestra de Cambra Teatre lliure eta Galiziako Orquesta Filharmoniarekin batera egin ditu birak, baita diskoak grabatu ere. Salmoe hirukotearen sortzailea izateaz gain Bartzelona ondoan dagoen Riera Granollerseko Udal Musika Eskolako zuzendaria da eta eskolak ematen ditu Espainian.