Irutxuloko Hitza

Saskibaloia

Gaur jokatuko du Bruesak Ligako azken partida etxean Plus Pujol Lleidaren kontra (21:00)

raul perez

Joan den denboraldia gazi-gozoa izan zen Bruesa Gipuzkoa Basketentzat. Gozoa ACB Ligako talde onenak Illunben izan zirelako. Eta gazia partida gutxi irabazi zituztelako. Aurten LEB Ligan ez dira horren talde onak igaro Bruesaren kantxatik, baina iaz baino partida gehiagotan atera dira zaleak ahogozoarekin.

Bruesak 15 partida jokatu ditu Illunben eta haietako 12 irabazi ditu. Ziurrenik, zaleek ez dute oraindik lehena ahaztu. Luzapenaren ondoren irabazi zuten Lasoren jokalariek Breoganen kontra 100-97 Andy Pankok sartutako hiruko ikusgarriari esker.Etxean jokatutako hurrengo lau partidak irabazi zituen Bruesak. Cai Zaragoza, Burgos, Cantabria eta Rosalia esku hutsik itzuli ziren etxera. Los Barriosek, ordea, ustekabea eman zuen eta Lasoren taldearen bolada ona eten egin zuen (74-79).

Porrot mingarria

Etxean galdutako lehen partidak ez zuen eragin txarrik izan taldearengan, eta Illunben jokatutako hurrengo sei partidak poltsikoratu zituen. Etxean ez ezik, kanpoan ere ezin hobeto zebilen Bruesa, harik eta Aste Santuaren bezperan Alicante iritsi zen arte. Lehen postuko borrokarako oso neurketa garrantzitsua zen. Partida estua izan zen, baina azken minutuetan Alicantek ihes egin zuen markagailuan eta neurketa irabazi zuen (79-90). Lehen itzuliko porrotak ez bezala, Alicanteren kontrakoak lur jota utzi zuen Bruesa eta hurrengo partidetan, bai etxean bai kanpoan, taldea ez da denboraldi hasieran bezain indartsu agertu. Melillak, adibidez, 81-83 irabazi zuen.

Duela bi aste norabidea zuzendu zuten Pankok, Hopkinsek eta bere taldekideek Palmari erraz irabazita. Gaur irabaztea ezinbestekoa du Bruesak. Lehen postua lekutan du ¬CAI Zaragozak geratzen diren bi partidak galdu beharko lituzke¬, baina bigarren postua ziurtatzeko ezin du gaur hutsik egin. Illunben jokatuko duten hurrengo partida kanporaketetan izango da, hilaren 20an.