Irutxuloko Hitza

Ingurumena

Araudi berriaren bidez, etxebizitzetan ura aurreztu eta hondakinak hobeto kudeatzea nahi dute.

xabier etxabe

Kiroldegi eta beste udal eraikinetan ura aurrezteko edo eguzki energiari etekina ateratzeko neurriak hartu ditu Udalak. Energia aurrezteko neurri hauek eraikin pribatuetan ¬eraikin arruntetan¬ ezarri nahi ditu Udalak, eta horretarako araudi berria sortu du. Denis Itxaso Ingurumen zunegotziak aurreratu duenez, araudia irailean jar daiteke indarrean.

Udalak klima aldaketaren aurkako plana du indarrean eta plan honen ardatzetako bat izango da etxebizitzetan energia aurrezteko araudia. Honen bidez, hirian eraiki edo eraberritu behar dituzten etxebizitza eta lokalek araudiak zehaztuko dituen ingurumen baldintzak bete beharko dituzte.

Aldaketa honekin, etxebizitza berriak garestiagoak izango diren arren, «etxera iristen diren ordainagiriak txikiagoak izango direla», esan du Ingurumen zinegotziak.

Irailean, araudia indarrean jartzen denean, hauek izango dira etxebizitza berriek karbono dioxidoa gutxitu eta energia aurrezteko hartu beharreko neurriak. Energia alferrik ez galtzeko, leiho, harresi eta teilatu egokikiak jarri beharko dituzte. Bestetik, berogailu eta argiztapenak energia aurrezteko ahalik eta eraginkorrenak izan beharko dira. «Berogailu sistema neurtuta eta kontrolatuta egon beharko du; era horretan egindako kontsumoa zenbatu ahal izango dugu», azaldu du Ingurumen zinegotziak. Era berean, etxebizitzako ura berotzeko plakak eta argindarra sortzeko plaka fotovoltaikoak jartzea aurreikusiko du araudiak.

Argindarra eta berogailuaren energia aurrezteko irtenbide hauekin batera, ura alferrik ez xahutzeko eta hondakinak behar bezala bereiztu eta birziklatzeko helburua du araudi honek.

Neurri sorta honen bidez eraiki eta eraberritutako etxebizitzek ur gutxiago gastatzeko sistema berriak izango dituzte komun eta iturrietan. Etxebizitzek ere birziklapenerako hondakinak ¬zabor orgainkoa, ontziak, papera eta kartoia, beira eta bestelako hondakinak¬ uzteko tartea izan beharko dute. Birziklapenerako ez ezik, etxebizitzek ere bizikleta edota haur kotxea uzteko espazioa erabilgarri izan beharko dute.

Eraberritze lanak egiteko diru laguntzak

Energia aurreztu eta klima aldaketaren aurka borrokatzen lagunduko duten neurri hauek ezartzeagatik Udalak diruz lagundu nahi ditu araudia betetzen dutenak. Denis Itxasok aipatu duenez, ingurumenaren aldeko neurri hauek hartzeagatik «eraikitze lanak egiten dituztenei zergak arintzea aztertzen ari gara».