Irutxuloko Hitza

Antzerkia

Antzerki Feriak irudia berritu du goitik behera eta izen berria hartu du: dFeria.

nerea lizarralde

Antzerki Feria izen eta irudi berriarekin iritsiko da aurten. Oraindik ez dute programazioa plazaratu, baina jaialdiak izango duen irudi eta izen berria aurkeztu dute. Aurten dFeria izena hartu du antzerkiari eskainitako jaialdi honek eta uztailaren 8tik 12ra bitartean gozatu ahal izango du publikoak antzerki programazioarekin.

Nu Comunicacion enpresak diseinatu du dFeriaren irudi eta logo berria. Kartelak antzoki bateko oihal koloretsua erakusten du eta kanoi argi batek dFeria argiztatzen du. Beheko marra beltzak ikusleen lehenengo ilara irudikatu nahi du. Nu Comunicacionenko ordezkariak, Maider Gomezek kartelaren diseinua azaldu du: «Gure proposamen grafikoan aktoreek bere lanean aurre egin behar dioten elementuak islatu nahi izan ditugu, ohiala, publikoa eta fokoa».

Antzerki Feriak 20 urte

Duela 20 urte, 1988an sortu zen Donostiako Antzerki Feria eta harrez gero etapa desberdinak bizi izan ditu. 1998n beste garai bati ekin zion eta iaz hazi egin zen, eszenatokiz aldatu eta Victoria Eugenia Antzokia estreinatu baitzuen. Horrela jarraituko du aurten ere.

Nazioarteko hainbat obra

DFeriak, aurreko edizioetan bezala antzerkiaren ikuspegi garaikidea emango du. Obra klasiko batzuk aurkezten badira ere, hauek beti ere, bertsioak izan ohi dira.

Jaialdiak pauso sendoa eman du gainera kanpora begira. Egitarauaren %60 Amerika, Europa edo Asiatik ekarritako proposamenek osatuko dute.

Dantzak eta hainbat motatako ikuskizunek ere izango dute dFerian bere lekua eta protagonismo handia izango dute. Norka Chiapusok dFeria ekimen eta proiektu berrien sorleku bihurtzea nahi dutela esan du aurkezpenean.