Irutxuloko Hitza

Musika

Euskaraz abestuko duen talde bakarra Ken Zazpi talde bizkaitarra izango da

erredakzioa

Dagoeneko prest dago Aste Nagusian Sagueseko eszenatokian joko duten taldeen programazioa: M-Clan, La Casa Azul, Pignoise, Mago de Oz, Ken Zazpi, Los Secretos, Conchita eta Rosario Flores. Publiko gazteari zuzendutako musika egitaraua da Saguesekoa eta askotariko estiloak jasotzen saiatzen omen dira antolatzaileak, baina musikazale guztiak asetzea ez da lan erraza. Musika euskaldunak, aurten ere, gau bakarra izango du Saguesen, Eñaut Elorrieta buru den Ken Zazpirena.

Iaz argitaratu zuen Gernikan sortutako Ken Zazpi taldeak bere azkeneko eta laugarren diskoa, Argiak. Arrakasta izugarria lortu du pop rock talde euskaldunak.

Mago de Oz, M-Clan, Pignoise, La Casa Azul, Rosario Flores...

Klasikoek ere izango dute bere lekua Saguesen. Espainiako Los Secretos pop talde klasikoak 30 urte darama eszenatokietan eta birak egiten, mota guztietako arazoei aurre egiten. A tu lado, Dejame edo Ojos de gata abesti ezagunak izango dira entzungai zuzenean.

Folk metala eta musika zeltiarra lantzen du Mago de Oz taldeak. Rocka, Galiziako muñeirak, arrantxo-musika... Estilo eta doinu aldakorrak dira Mago de Oz-enak. Umore garratza eta ironia da nagusi beraien abestien hitzetan. Taldeak platinozko diskoa eskuratu berri du bere azken diskoko 100.000 ale saltzeagatik.

Irrati kate komertzialetan etengabe jarri dute Conchitaren Nada que perder abestia. Madrilgo musika zirkuituko hainbat aretoetan ekin zion bere ibilbideari. Iaz kaleratu zuen bere lehen diskoa musikagile gazteak.

M-Clan 90.hamarkadan hasi zen lanean, Carlos Tarqueren taldean hainbat aldaketa izan dira baina aurrera egin du bere blues, soul eta rock musikarekin. Memorias de un espantapajaros da beraien azken lana.

Rosario Flores, Bartzelonako La Casa Azul pop talde gaztea edo Telebistako Los hombres de Paco telesailari esker ospea lortutako Pignoise taldeak ere izango dira Saguesen.