Irutxuloko Hitza

Musika

Aventuras de Kirlian edo Le Mans taldeen sortzailea da Teresa Iturrioz; Single Ibon Errazkinekin batera sortutako proiektua da.

nerea lizarralde

Single Teresa Iturriozen proiektu pertsonala da. Aventuras de Kirlian eta Le Mans pop talde independenteetako baxujole eta kanta idazlea izan zen. Orain bakarkako ibilbideari ekin dio baina oraindik ere Ibon Errazkin, Le Manseko kide ohia du alboan, konpositore eta ekoizle gisa. «Ibonek esaten dit bera nire laguntzailea dela baina lagundu baino gehiago egiten dit, niretzat Single biok gara. Ibon hamaika proiektutan murgilduta dago eta ez du astuna izan nahi, beharbada horregatik nahiago du bigarren plano batean geratzea», esan du Iturriozek.

2006an aurkeztu zuen Singlek Pio Pio izeneko lehenengo diskoa. Le Mansen bidea berreskuratu eta popa berrasmatu zuten, reggae eta country-pop, R&B, tecno-pop eta hip hoparekin. Gaur gaueko emanaldian disko honetako eta aurretik kaleratutako lanetako abestiak joko dituzte. Gustuko dituzten taldeen kantuak ere ez dira faltako. Single-eko kide den Tito Pintadok (bere bakarkako elektro pop proiektua , Anti, aurkeztuko du kontzertuaren lehen zatian.

Iturriozek lehen aldiz joko du Gazteszena aretoan. «Ikusle moduan makina bat aldiz joan naiz eta kontzertuak egiteko oso aproposa iruditzen zait. Gainera programazio berritzailea du eta mota askotako publikoa erakartzeko gai da», dio Iturriozek.