Irutxuloko Hitza

Piraguismoa

Ekaitz Saies Europako Txapelketatik kanpo geratu da; ekainean Olinpiar Jokoetan egoteko azken aukera izango du.

naroa balsategi

Ur-lasterretako piraguismoan asteburu garrantzitsua da datorrena. Jon Erguin donostiarra Eslobakian izango da nazioarteko txapelketa bat jokatzen eta helburua Olinpiar Jokoetarako txartela lortzea izango da. Geratzen zaion azken aukera baliatu behar du Groseko piraguistak Beijing-en egoteko.

Joan den asteburuan Polonian izan zen Erguin. Europako Txapelketa jokatu behar zuen baina lehen proban min hartu eta ezin izan zuen bidea behar bezala bukatu. Aipatu Europako Txapelketa hasi aurretik minduta zuen ezker sorbalda baina lehiatzeko moduan bazegoen. Joan den ostiralean hartutako kolpearen ondorioz, min hartuta jarraitzen du. Egunotan luzamenduak egiten egon da Groseko piraguista baina hala ere mina du. Dena dela, Olinpiar Jokoetan egoteko azken aukera aprobetxatu nahi du Jon Erguinek.

Eslobakian jokatuko den proba ostiralean hasi eta igandean bukatuko da. Egun bakoitzeko, Erguinek proba bat egin beharko du eta Espainiako Selekzioko gainontzeko aurkariek baino marka hobea lortzen badu Beijing-o Olinpiar Jokoetan egongo da Groseko piraguista.

Ekaitz Saies, Europako Txapelketatik kanpo

Ur lasaiei dagokienez, Europako Txapelketa asteburu honetan jokatuko da Milanen ¬Italia¬. Duela hiruzpalau aste Ekaitz Saiesek Espainiako Selekzioarekin txapelketa honetan parte hartzeko proba egin zuen baina Jobino Gonzalez aurkaria azaldu ez zenez, ezin izan zuten egin. «Hasieran gaixorik zegoela esan zuen Gonzalezek, baina gero entrenatzen egon zela jakin izan genuen. Europako Txapelketan egoteko txartela kirola eginez lortu beharrean bulegoetank lortu nahi zuen, eta hala izan da», adierazi du Saiesek.

Asteburuan ez da Milanen egongo baina hamar egunez Sevillan izango da entrenatzen. Ondoren Londresen egongo da, «bi astez munduko txapeldunarekin egongo naiz entrenatzen. Oso lagun onak gara eta Munduko Kopei begira ondo prestatu nahi dugu». Ekainaren lehen asteburuan Hungarian izango da Munduko Kopan eta astebete beranduago Alemanian lehiatuko da proba berean.

Entrenamenduak, Olinpiar Jokoei begira

Asteburu honetan Emilio Merchanek edota Jobino Gonzalezek Olinpiar Jokoetarako txartela lortzen badute ¬K-1 1.000 metro eta K-1 500 metro, hurrenez hurren¬, Ekaitz Saiesek bi plaza horietako bat bete ahal izango du. Espainiako Selekzioak ekainaren bukaeran egingo duen proba gaindituz gero, Beijing-en izango da Saies.