Irutxuloko Hitza

Ingurumena

Odon Elorza alkateak eta Denis Itxaso ingurumen zinegotziak jaso dute saria Madrilen.

erredakzioA

Forum Ambiental fundazioak eta Ecocityk autengo Ciudad Sostenible saria eman diote Donostiari.

Sari banaketa atzo izan zen Madrilen eta bertara hurbildu ziren Odon Elorza alkatea eta Denis Itxaso ingurumen zinegotzia.

Epaimahaiaren balorazioa

Hainbat eta hainbat izan dira epaimahaiak Donostiaren kasuan aintzat hartu dituen jarrerak. Besteak beste, aldaketa klimatikoaren aurka Donostia karbono emisio neutroko hiri bihurtzeko ahalegina saritu dute, baita bidegorri sare zabala diseinatu izana ere. Energia berriztagarrien erabilera sustatzeko Udalak ezarririko helburu estrategikoak, ekimenak eta ekintza ildoak ere hartu dituzte oso kontutan. Azkenik, hondakinak murrizteko bidean harturiko neurriak ere modu berezian baloratu dituzte; bigarren eskuko azoken sustapena, edalontzi birziklagarrien ekimena eta panel informatiboen berrerabilketa, adibidez.

6 urtez iraunkortasuna saritzen

Forum ambiental fundazioak eta Ecocityk antolatu duten seigarren sari banaketa da aurtengoa. Hala, herri, hiri eta instituzioek iraunkortasunaren bidean eginiko lana eskertu, baloratu eta ezagutaraztea da helburu nagusia; sarituak erreferente eta eredu bihurtzea, alegia.

Aurtengo edizioan 5.000 biztanletik gorako udalerri guztiek izan dute parte hartzeko aukera. Epaimahaia, bestetik, Bartzelona, Madril edo Gasteiz (iaz saritua) bezalako hirietako udal ordezkariek osatu dute, besteak beste.