Irutxuloko Hitza

Atxiloketak

Amara Zaharreko Igor Suberbiola eta Egiako Jon Salaberria beste bi ustezko etakideekin batera atxilotu dituzte.

erredakzioa

ETAko ustezko lau kide atzeman zituen herenegun gauean Frantziako Poliziak Bordelen, Guardia Zibilarekin batera egindako operazioan.

Poliziak gaueko hamaika eta erdiak aldera egin zituen atxiloketak Frantziako hiriko erdialdeko etxe batean, tren geltokitik gertu. Poliziak berak jakinarazi duenez, Francisco Javier Lopez Peña galdakaotarra, Ainhoa Ozaeta andoaindarra eta Jon Salaberria eta Igor Suberbiola donostiarrak dira atzemandako lau lagunak; Amara Zaharrekoa da Suberbiola eta Egiakoa Salaberria.

ETAko zuzendaritzako kidetzat zituen poliziak eta, azaldu duenez, «bilera garrantzitsua» egiten ari ziren atxiloketaren unean. Laurak armekin zeudela ere azaldu du Frantziako poliziak baina ez zutela eragozpenik jarri atxilotzeko. Atzoko gaua Bordeleko polizia-etxean igaro zuten eta goizeko 11:00ak aldera eraman zituzten berriz ere miatzen ari diren etxera. Gaur eramango dituzte Parisera.

Bi donostiar

Jon Salaberria egiatarra (1969) Jarrai gazte erakundeko bozeramaile izan zen, eta Euskal Herritarrok-eko eta Sozialista Abertzaleak-eko parlamentari Eusko Legebiltzarrean 1998 eta 2005 bitartean. Baltasar Garzon Auzitegi Nazionaleko epaileak auzipetua du ETAren finantzaketan ustez parte hartzeagatik baina, 2005ean, auzi garaian, ihes egin zuen Salaberriak.

Amara Zaharreko Igor Suberbiola 29 urteko gaztea 2001ean atxilotu zuten Jarrai-Haika-Segi auziaren baitan baina baina baldintzapean aske geratu zen beranduago. 2004an ihes egin zuen Frantziara.



Andoaingo alkatea ere bai

Atzo goizez Andoainen atxilotu zuen Guardia Zibilak Jose Antonio Barandiaran alkate ohia, atzemandako kideekin bildu izana egozten diote.

Era berean, Bordeleko etxearen jabea ere atxilotu dute ustezko etakideei etxea alokatzeagatik.