Irutxuloko Hitza

Erakusketa

Uztailaren 19tik urriaren 5era izango da ikusgai artista latinoamerikarrek osatutako erakusketa.

erredakzioa

Argentina, Brasil, Txile, Kolonbia, Costa Rica, Guatemala, Mexiko, Puerto Rico eta Uruguaiko jatorria duten artisten obra ekarriko du Tabakalerak udan. 30 bat artelan jasoko ditu, arte berritzaile eta konprometituenaren erakusle direnak.

Ikus-entzunezkoak nagusi

Latinoamerikako azken hamarkadetako sorkuntza lana islatuko dute obrek eta 60.ko hamarkadatik gaur arteko ildo artistiko esanguratsuenetako batzuen ikuspegia eskainiko du bilduma handiak.

Daros-Latinamerika bildumako lanen haukeraketa bat izango da ikusgai Donostian. Bilduma hau Europan Latinoamerikako arte garaikideaz arduratzen den proiektu garrantzitsuena da. Ikus-entzunezko sorkuntza izango da nagusi erakusketa honetan. Bideo instalazioak, proiekzioak eta zinema mundutik hurbil dauden obrak ere bilduko ditu.

Erakusketaren alderdi sentsual eta sentsorialena Cildo Mereiles, Valeska Soares edo Ernesto Neto itzal handiko artista brasildarren instalazio handiek erakutsiko dute.

Bide artistiko kontzeptualagoetatik eramango dituzte ikusleak Luis Cmnitzer artista eta teorialari urugaiarrak. Bere artelanen osagai politiko eta sozialak indar handia du. Arte kontzeptualaren bueltan ere ibiliko dira beste artista gazte batzuk: Ivan Capote eta Antonio Eligio Fernandez kubatarrak, Antonio Dias brasildarra edo Costa Ricako Priscilla Monge, besteak beste. Guztiek ezaugarri bat dute komunean, beraien lanetan oso kontuan hartzen dute ikuslearekiko gertutasuna eta komunikazioa.

Zuricheko Daros-Latinoamerika bilduma

Proiektu hau Tabakalera eta Daros-Latinamerika bildumaren arteko elkarlanaren ondorioa da. Zurizheko bildumaren ezaugarririk garrantzitsuena honakoa da, bildumazaletasuna proiektu kulturaltzat jotzen dutela. Horrela, bildumaren helburu nagusien artean artista latinoamerikarren arteko harremanak sortzea, bertako arte garaikidearen ekoizpena eta hedapena bultzatzea eta artisten nazioarteko proiekzioa sustatzea daude.