Irutxuloko Hitza

San Sebastian Martiri elizaren altzoan jaio zen Auskalo Aisialdi Taldea duela 20 urte.

Antiguako San Sebastian Martiriren babesean jaio zen Auskalo Astialdi Taldea. Katekesia bukatu eta sendotza iritsi bitartan zubi lana egiteko sortu zuten taldea. Gazteei heziketa berezia ematea nahi du Auskalok. «Ez dugu lanik egiten soilik sendotzari begira. Sendotza hor dago, baina guk gazteei beste mundu bat posible dela erakutsi nahi diegu, jolas kooperatibo eta antzeko dinamikekin», azaldu du Iosu Etxezarraga Auskaloko begiraleak. «Baloreetan hezi nahi ditugu gaztetxoak. Taldea ez da bakarrik ondo pasatzeko, baizik eta baloreak transmititzeko», dio begiraleak.

1985ean Inaxio Agirre eta Xabier Anza begiraleak eta gazteekin zebilen Koldo Apeztegi apaiza sendotzako lehen kurtsoko zenbait gaztetxorekin lanean hasi ziren. Gaztetxo haiek izango ziren gerora Auskaloko lehen begiraleak.

Lehen urteetan aisialdi taldearen baitan zenbait azpitalde sortu ziren, Austar mendi taldea eta Bultza Antigua eta Seminarioko kontzientzia eragozleena, adibidez. 15 bat begirale ditu aisialdi taldeak eta 11 eta 18 urte bitarteko 40 bat gaztetxorekin ari dira lanean. Adinaren araberako sei taldetan daude banatuta gaztetxoak, eta astean behin elkartu ohi dira. Gazteenak larunbatetan biltzen dira eta zaharrenak, astegunetan. Gaztetxoekin ginkanak eta antzeko jolasak egiten dituzte, besteekin harremanean jartzea izaten da gakoa. Zaharrekin, bestalde, elkarrizketak eta rol jokoak gehiago jorratzen dituzte.

Egoitza elizan bertan

Matia kaleko elizaren behealdean du egoitza Auskalok. Ekitaldi aretoan hainbat jarduera egiten dituzte. Esate baterako, ekainaren 1ean, gurasoei begira ikuskizuna prestatuko dute. Elkarbizitzak ere egin ohi dituzte zubietan, eta udaran kanpaldia egiten dituzte, Errioxan. Astialdi taldea Antiguan sustraituta dago. «Jakintza, Ibai, Santo Tomas...Eskola horietako ikasle asko pasatu dira Auskalotik. Gainera, nolabait, antiguatartasuna bultzatzen dugu», gogoan du Etxezarragak. Besteak beste, Olentzerori eta Mari Domingiri egiten dieten harreran parte hartzen du Auskalok.