Irutxuloko Hitza

Hirigintza

Ekainaren bukaeran Erregina Erregenteko zirkulazioa ohiko egoerara bueltatuko da.

x. etxabe

Erregina Erregenteko lanen ondorioz, gaur 22:00etatik aurrera eta astearteko 8:00ak arte Erdialdeko hainbat kaletan zirkulazioa aldatuko dute. Ernesto Gasco Mugikortasun zinegotziak Erregina Erregenteko lanak erritmo onean doazela argitu du eta kale horretako zirkulazioaren gora beherak ekaina bukaerarako ohiko egoerara itzuliko direla adierazi du. Kaleko lorategiak, berriz, uztaila bukatzerako jarrita egongo dira.

Erregina Erregente kalean egingo dituzten lanek inguruko kaleetan izango dute eragina. Hori dela eta, Erdialdera hurbildu behar duten herritarrek garraio publikoa erabiltzea gomendatu du Ernesto Gascok.

Besteak beste, Okendo kalea itxiko dute Bulebarrera sartzeko aldean. Hortaz, Amaratik edota Antiguatik datozen autobusak Bulebarrera sartzeko Okendo kaletik Bengoetxera joko dute eta Legazpi kalean sartuko dira Bulebar aldera abiatzeko. Ibilbide hori egiteko, «Legazpi kalearen norabidea aldatuko dugu», azaldu du Mugikortasun zinegotziak. Autobusek ez ezik, Bulebar aldera egin nahi duten autoek bide bera jarraitu beharko dute.

Argentinar Errepublikako autoak Parte Zaharretik

Erregina Erregenteko lanek, dena den, ez dute Bulebarreko aparkalekua itxiaraziko. Bertara sartu nahi duten autoek, ordea, buelta handiagoa egin beharko dute. «Argentinar Errepublikaren pasealekutik doazen autoak Salamanka pasealekutik jarraitu eta Etxague Jeneralaren kalera sartu beharko dira ondoren Aldamar kaletik segitzeko», adierazi du Ernesto Gascok.

Aldaketarik ez Zurriolatik datozen autobusentzat

Erregina Erregenteko kalean lanak egingo badituzte ere, Zurriola pasealekutik datozen autobusak Erregina Erregentetik pasatuko dira, autobus, taxi eta larrialdietako autoentzat bide bat utziko dutelako libre.

Erregina Erregentearen kalean bakarrik ez, autoak Erdialderaino jo eta bidean trabatu ez daitezen, autoen zirkulazioa itxiko dute Zurriola pasealekuan, Lapurdi plazan, hain justu. «Autoak Kolon pasealekutik bideratuko ditugu, Santa Katalina zubian sartu eta handik Argentinar Errepublikako pasealekura ala Okendo aldera jo dezaten», azaldu du Gascok.

Zirkulazio aldaketa hauek egiteko, Legazpi kalean eta Salamanka pasealekuan autoa uzteko lekuak kenduko dituzte.