Irutxuloko Hitza

Politika

Banderen auzia dela eta, Donostiako Ezker Abertzaleko hainbat kidek agerraldi jendetsua egin dute.

igone fdez. MARIEZKURRENA

Espainiako bandera «Euskal Herriaren ukapenaren eta zatiketaren sinbolo» dela salatu zuen Donostiako Ezker Abertzaleak atzo Alderdi Ederren eginiko ikurriñaren aldeko agerraldian. Tartean izan ziren, besteak beste, Agustin Rodrigez, Miren Zinkunegi, Felix Soto eta Joxe Austin Arrieta zinegotzi ohiak.

Ikur inposatua

Bandera hori-gorria «ikur inposatua» dela azpimarratu zuten, «donostiarroi ez baitigute galdetu zer nahi dugun». Zentzu horretan, gogorarazi zuten hiritarrek aspaldi adierazi dutela ez dutela bandera hori maite «Anoetan, auzoko jaietan, ekitaldi kulturaletan... ez baita halakorik ikusten». Horrexegatik, «Borboien sinboloak Donostian lekurik ez duelako», Odon Elorza alkateari espainiako bandera «berehala» kentzeko deialdia egin zioten.

Era berean, gogor kritikatu zuten PSOErekin batera Udal Gobernua osatzen duten EB eta Aralar alderdien jarrera: «esaten duten moduan, bandera jartzeko erabakia eurek jakin gabe hartu badute, Udal Gobernua uzteko duintasuna eduki beharko lukete».

Maiatzaren 19az geroztik udaletxeko balkoian ikus daitekeen espainiar ikurra faxistek 1937an ekarri zutela gogorarazi zuten eta «70 urte geroago gerra eta salbuespen egoeraren estrategiarekin jarraitzen dutenei» aurre egingo dietela esan zuten ozen: «ez dugu amore emango ban-dera esapainola balkoitik kendu arte».

Mobilizazioetarako deialdia

Antidemokratikotzat jotzen dute Udalaren jarrera eta hori salatzeko egingo dituzten mobilizazioetan parte hartzeko deialdia luzatu zieten hiritarrei:

Gaur, arratsaldeko 17:30tan manifestaldia abiatuko da Bulebarretik Donostian demodrazia zero, guk ikurriña, guk independentzia! lelopean.

Ekainaren 27an, udal hauteskundeen urteurrena dela eta, kontzentrazioa egingo dute 20:00tan udaletxe parean.

Eta ekainaren 30ean, udalbatza dela eta, kontzentrazioa egingo dute 12:00tan udaletxe parean.