Irutxuloko Hitza

Zinema

Aitzol Aramaiok zuzendutako 'Un poco de chocolate' filma Antiguo Berri zinema aretoan dago ikusgai.

nerea lizarralde

Iñake Irastorza aktorea pozik dago Un poco de chocolate filmaren emaitzarekin. Irrifarre batekin ikusten den filma dela dio donostiarrak.

Nolakoa da zure pertsonaia?

Maite naiz, taberna bateko zerbitzaria. Paper txikia daukat, baina oso polita da. Asko gustatzen zait Hector Alterio, protagonista, eta Maiteren artean sortzen den kontrastea. Alteriok burua junda dauka pixka bat. Zailtasunak ditu, ni beste izen batez deitzen dit... Gainera, proposamen bat egiten dit eta zur eta lur geratzen naiz. Ateari egundoko zartakoa ematen dio tabernatik ateratzen den bakoitzean... Oso urduri jartzen nau eta kezkatu egiten nau.

Hector Alteriorekin lan egiteko aukera izan duzu. Zer iritzi duzu Alterioz ?

Niretzat emozionantea izan da. Aktore handi bat da Alterio. Hunkitu egin ninduen eta ni ez naiz jendeari horrelakoak esaten dizkiotenetakoak baina Alteriori bai, «Niretzat ohore bat da zurekin lan egitea», esan nion. Oso jatorra eta oso profesionala da, ez nuen besterik espero. Daukan adinerako oso pertsona bizia da. Julieta Serranorekin ere gustura egon naiz.

Daniel Bruhl eta Barbara Goenaga aktoreak dira film honetako bikote gaztea.

Barbara umetatik ezagutzen dut, neska oso jatorra eta aktore ona da. Danielek oso inpresio ona eman zidan. Salvador filma egin zuenetik gertuagotik begiratzen dugun aktorea dela esango nuke. Bere ibilbidea hemen eta Alemania artean garatuko dela ziur nago.

Filma egin baino lehen irakurrita al zenuen Unai Elorriagaren 'SPrako tranbia'?

Bai. Asko gustatu zitzaidan. Filma egin behar zutela eta nirekin kontatzen zutela esan zidatenean... Ilusio handia egin zidan. Ez nuen espero inondik inora. Aitzol Aramaiok oso gidoi polita egin du. Garai hauetan ez gaude ohituta horrelako pelikulak ikustera, erritmo honetakoak.

Zer iruditu zaizu filma zineetan ikusi duzunean?

Barruan zaudenean perspektiba pixka bat galtzen duzu eta gainera hori da. Emaitza asko gustatu zait. Oso iritzi politak jaso ditu gainera. Jendeari filma gustatu zaio oro har. Beste mota bateko filma da, beste erritmo batean kontatzen dena... Merezi du ikusteak. Filma irrifar batekin ikusten duzu. Bestalde, Aitzol Aramaiok etorkizun izugarria izango duela ziur naiz. Kontuan hartzeko zuzendaria da, oso hasiera ona izan baitu.