Irutxuloko Hitza

Mugikortasuna

Trenbideak bikoizteko lanak azkartzeko eskatuz, erakunde adierazpena egin du Udal Gobernuak.

xabier etxabe

Odon Elorza alkateak Eusko Treneko trenbideak bikoizteko proiektuak duen atzerapena salatu du. Eusko Jaurlaritzako Garraio Sailak Topoa Altzaraino iristeko «interesik ez» duela kritikatu du Elorzak. Loiola eta Herrera arteko trenbideak «lehenbailehen» bikoiztu, Altzan geltokia egin eta Herrerako tren geltokia berritzeko proiektua Eusko Jaurlaritzaren lehentasun bihur dadin, erakunde adierazpena prestatu du Udal Gobernuak. Gaur eztabaidatuko du Udalbatzak adierazpena.

Odon Elorzak berretsi duenez, EuskoTreneko trenbide sarea indartzea da Udal Gobernuaren «lehentasun nagusietako bat». Alkatearen ustez, «Erdialdetik joango den tranbia baino, garrantzi handiagoa du Topoak Altza eta Erdialdea lotzea».

Era berean, haserre agertu da Elorza trenbidea bikoiztu eta Intxaurrondon geltokia egiteko proiektuak duen atzerapenagatik. «2000-2004 urte artean, Alvaro Amann Eusko Jaurlaritzako Garraio sailburua zenean, trabak besterik ez zituen jarri hirian Eusko Tren lineak bikoizteko». Egun, Nuria Lopez de Gereñu da Eusko Jaurlaritzako Garraio sailburua eta eragozpen berberak jartzen dituela kexatu da alkatea.

Sailburuaren «hankasartzea»

Loiola eta Herrera arteko trenbidea bikoitzeko lanak urrian hasiko dituztela iragarri zuten egunean, sailburuak hankasartu zuela esan du alkateak. «Topoa Altzara iristeko atzerapena arrazoitzeko Auditz Akularreko etxebizitzen kokapena oraindik zehaztu gabe zegoela esan zuen eta hori aitzakia merkea da, Auditz Akularren etxebizitzen kokapena duela bizpahiru urtetik zehaztuta dagoelako».

Erakunde adierazpena prestatu du Udal Gobernuak

Eusko Jaurlaritzak Topoa Altzaraino iristeko proiektua ahal bezain laster gara dezan erakunde adierazpena aurkeztuko du Udal Gobernuak gaur hileroko osoko bilkuran. Adierazpen honen bidez, lanek duten atzerapenaren inguruan kexu agertu da Gobernua. Era berean, hiri barnean tren bidaiek prezio bera izatea eskatu dute. Aldarrikapenarekin bat egiteko eskatu die alkateak udal alderdiei.