Irutxuloko Hitza

Buenavista, Lardialde, Igeldo eta Lugaritzen eraikitako Babes ofizialeko 235 etxebizitza zozketatu ditu Donostiako Udalak .

Ez ohiko zirkulazioa nabari zen atzo Anoeta inguruan. Izan ere, Donostiako Udalak Babes Ofizialeko 235 etxebizitzaren zozketa egiteko hitzordua finkatua zuen Gasca kiroldegian arratsaldeko 16:30etan.

Ordu erdi lehenago, ordea, errenkada sekulakoa zen jada. Horrelakoetan gertatzen den bezala, urduritasuna, itxaropena eta mesfidantza nahasturik ziren giroan. «Horrelako zozketa batera natorren bigarren aldia da; badakit loteria hutsa dela baina, bada ezpada ere, saiatu beharra dago», zioen Begoña Hernandezek. Beste batzuek, Iñigo Aguayok bezala, jarrera etsituagoa ageri zuten hasieratik: «Lanean nabil aspalditik, baina hala ere, gurasoenean bizi naiz, etxe bat erostea ezinezkoa delako orain. Hala ere, kuriositatez etorri naiz, nire kasuan jakinmina itxaropena baino handiagoa da».

Kepasakonlakasakoen salaketa

Bikote gazteak, erretiratuak, familia handiak... 4.190 eskatzaile, guztira. Kiroldegiko ateak ireki bezain pronto sartu ziren denak barrura eta atzean utzi zituzten Kepasakonlakasa Etxebizitza duinaren aldeko Gipuzkoako Asanbladakoak. Haiek ere hitzordua baitzuten atzo Gascako atarian. Etxebizitza publikoa ya! zioen pankartaren atzean bildu ziren 10 bat kide haiek zirkotzat jotzen duten zozketa salatzeko. «Hain beharrezkoa den etxebizitzarako eskubidea sari bat balitz bezala zozketatzen omen duen zirku bat da hau», zioen asanbladako bozeramaile Jürgen Wolfek. Bide batez, Donostian «espekulatzaileak aberasten dituzten ia 9.000 etxe huts daudela» gogorarazi zuten eta inork ez duela horretan esku hartzeko borondaterik agertu.

Bi aurpegi

Atzokoan, hiru multzo bereiztu ziren zozketarako. Alokatzeko 80 etxebizitza zozketatu zituzten batetik, babes ofizialeko azaleran eraikitako 30 bestetik eta tasatutako 25 azkenik.

Udaleko ordezkariak zorionekoen izen-abizenak irakurtzen ari zirela, bat-batean, oihu batek eten zuen isilunea. Esperanza zen, pozaren pozez, umea besotan zuela, berri ona ospatzen. Txalo zaparradaz babestu zuten gainontzekoek ere bere zoriona. «Hiru seme-alaba ditut eta urteak neramatzan honen zain», aitortu zuen hunkiturik.

Beste askok, ordea, burumakur egin zuten alde. Txanpon beraren bi aldeak dira.