Irutxuloko Hitza

Parte Zaharra

Alde Zaharra eguna egingo dute eta esku pilota partidak izango dira goizean eta arratsaldean.

r. perez

Alde Zaharra eguna egingo dute bihar Trinitate plazan. Udalak frontoia estal dezan nahi du Alde Zaharra Kirol Elkarteak eta aldarrikapen hori zabaldu nahi du lau haizetara bihar. Pilota partidak izango dira goiz eta arratsaldez.

10:00etan hasiko dira esku pilotan jokatzen gazteenak. 11:45ean, zenbait pilotari ohik, Errandoneak eta Alustizak tartean, dominak banatuko dituzte aldez aurretik pilotan jokatutako gaztetxo guztien artean. Barrenearen txanda ixango da ondoren.Bazkalostean berriz ere pilota partidak izango dira. Alde Zaharrako gaztetxoek eskuz binakako neurketak jokatuko dituzte elkarren kontra, 18:00etan barrenea egingo dute eta 19:00etan senior mailako partida izango da, eguna bukatzeko.

Urgullen barrena ere

Esku pilotan bakarrik ez. Urgullen barrena ibili ahal izango dira Alde Zaharreko pilotari gazteak. Goizean jokatu behar dutenak arratsaldean igoko dira Urgullera eta arratsaldean ariko direnak goizean ibiliko dira Urgullen zehar.

Hilaren 19an agerraldia egin zuten Alde Zaharra Kirol Elkarteko kide Iñaki Fernandezek, Juantxo Koka eta Oier Mendizabal pilotariek eta auzoko bi ostalarik plazako frontoia behingoz estal dezaten eskatzeko. Ordutik hona bi aste baino ez dira igaro, baina hala eta guztiz ere, Iñaki Fernandez baikor da. Jon Lasa Kirol zinegotziak begi onez ikusten du frontoia estaltzea eta gaia Kirol Patronatuan aztertuko dute. Fernandezen iritziz, ideia lehiaketa abian jartzea da jarraitu beharreko bidea.

Bihar eguraldiak Alde Zaharra Eguna zapuztuko balu, beste auzoren bateko pilotalekura joango dira . «Espero dut euriak eguna ez oztopatzea, baina oztopatuko balu, are nabariagoa izango litzateke pilotalekua estaltzeko beharra», dio Fernandezek.