Irutxuloko Hitza

Musika

Kontzertua doakoa izango da; Lou Reed, bestalde, ez da Jazzaldian izango.

erredakzioa

Jazzaldiak bi albiste eman ditu jakitera. Alde batetik, Bobby McFerrinek kontzertua emango du Zurriola hondartzako agertoki berdean Donostiako Orfeoiarekin . Bestetik, Lou Reed ez da Donostiara etorriko, izan ere Europako biraren azken zatia bertan behera utzi du.

Bobby McFerrin (New York, 1950) jazz musikako izen garrantzitsuenetako bat da. 70ko hamarkadan ekin zion abesteari jaioterriko kabaret eta klubetan eta 1988an Don`t worry Be Happy kanta aski ezagunarekin munduko hamaika txokotara iritsi zen.

Chick Corea piano jotzailearekin lan egindakoa da Mc Ferrin eta musika klasikoa ere jorratu du Saint Paul Chambers Orchestrarekin. Jazzaldia uztailaren 22tik 27ra izango da eta Mc Ferrinek 24an abestuko duZurriola hondartzan, Donostiako Orfeoia lagun izango duela. Zurriola hondartzako agertoki berdean izango da kontzertua, hain zuzen ere, 24an, 22:30ean. Emanaldia doakoa izango da. Jazzaldiak kontzertu jendetsua izango dela iragarri du; 2006an Bob Dylanek Zurriola hondartzan eskainitakoarekin alderatu du.

Lou Reed ez dator

Lou Reed zen aurtengo Jazzaldiko izen garrantzitsuenetako bat. Azkenean baina, ez da Donostian izango. Jazzaldiak aditzera eman duenez, Reedek Europako biraren azken zatia bertan behera utzi du eta hori dela-eta ez da hirira etorriko. Jazzaldia atsekabetuta agertu da Lou Reedek kontzertua bertan behera utzi izanagatik. «Bi urteko lana izan zen kontzertua lotzea; hitzarmena sinatuta zegoen eta hitzartutakoaren erdia aurreratuta zegoen. Penatuta gaude abeslariak ez duelako arrazoirik eman emanaldia bertan behera uzteko».