Irutxuloko Hitza

Udala

Urritik aurrera hasiko dira Goikoa jauregiko udal bulegoak Naturgasera lekuz aldatzen.

xabier etxabe

Udalak Errondo kaleko egoitza eskuratzeko hitzarmena sinatuko dute Naturgasekin astelehenean. Zortzi milioi euro ordainduko ditu Udalak eraikinaren truke. Goikoa jauregian, udaletxean eta hiriko beste hainbat eraikinetan dauden udal bulegoak berrantolatu nahi ditu Udalak. Aldaketa horiek egiteko, ordea, bulegoak kokatzeko behin behineko eraikina behar du Udalak. Naturgaseko eraikinak funtzio hori beteko du datozen urteetan.

Goikoa jauregia izango da udal eraikin guztietan lehena berritzen. Odon Elorza alkateak adierazi duenez, «urrian hasiko dira leku aldatze lanak». Goikoa jauregian, Sustapen Elkartea, Gazteria, Hezkuntza eta Giza Eskubideetako sailak daude, besteak beste. Bulego hauek, ordea, ez dituztela beharrezko baldintzak betetzen zehaztu du alkateak.

Lauzpabost solairuko eraikina egingo dute Naturgasen

Goikoa jauregiko bulegoak, ez ezik, udaletxeko eta beste eraikin batzuetako bulegoak bideratuko dituzte Naturgaseko eraikinera. Hori dela eta, Errondo pasealekuko egoitzak dituen 5.247 metro karratuak txiki geratu daitezkeelakoan, lauzpabost solairuko eraikina egingo dute oraingo eraikinari lotuta dagoen biltegian. «Enpresako materiala eta hodiak gordetzeko aurreikusita zegoen biltegia zabala da eta teilatu handia du, teilatua kenduta beste laupabost solairu egingo genituzke».

Honela, udal bulegoak Naturgasera bidaltzeko tramiteak martxan diren bitartean, Goikoa jauregia berritzeko proiektua aukeratzeko lanean ari da Udal Gobernua. Behin Goikoa jauregia berrituta, Hirigintza, Etxebizitza, Herri lan, Mugikortasun eta Ingurumen sailetako bulegoak kokatuko dituzte bertan.

Udal bulegoak berrantolatzeko plana eta Naturgasekin sinatutako hitzarmenaren inguruko xehetasunak azaltzeko uztaileko osoko bilkuran Odon Elorza alkateak azalpenak emango dituela argitu du.