Irutxuloko Hitza

Gizartea

Portugalgo Karabela' izena du eta dagoeneko bi lagunei ziztatu die Ondarretako hondartzan.

e. zabala

Portugalgo Karabela medusaren ziztadak lehen aldiz atzeman dituzte Donostiako uretan. Hala ere ez du esan lehenago horrelako kasuak egon ez direnik, «baliteke beste medusa mota baten ziztadarekin nahastu izatea», azaldu zuen atzo prentsaurrekoan Jon Freixa Gipuzkoako Gurutze Gorriko arduradunak. Azken astean 23-30 marmoka harrapatu dituzte Donostiako badian.

Marmoka mota hori beti egon dela azaldu du Freixak, baina azken urteetan gehiago azaldu direla inguruetan. Gurutze Gorriaren datuen arabera, azken urteetan ez da hildakorik egon Portugalgo Karabelak ziztatuta. Beste marmoka mota batzuek baino gorridura handiagoak sortzen ditu marmoka horren ziztadak, eta min handiagoa eragiten du. Hala ere, pertsona bakoitzarengan erreakzio desberdina du. Horrelako medusa batek ziztatu ezkero, eta soroslerik egon ezean, jarraitu beharreko aholku batzuk eman ditu Freixak. Ziztada ez da eskuekin ukitu behar. Medusaren zatiren bat gorputzean itsatsitik geratu bada kentzen saiatu behar da, baina eskuak babesturik. Ez da ziztada ur gaziarekin garbitu behar, onena izotza jartzea da, eta ahal bezain azkar medikuarengana joan behar da.

Azken astean bi kasu

Azken astean Portugalgo karabelak ziztatutako bi pertsona egon dira Donostian. Bi kasuak Ondarretako hondartzan izan dira. Lehena ostiralean izan zen, eta 30 urte inguruko gazte bati gertatu zitzaion. Bigarrena larunbatean gertatu zitzaion ume bati. Lehenari min handiagoa eragin zion hasieran, baina biak ongi daude.