Irutxuloko Hitza

Kontzertua

Ia 40.000 zalek New Jerseyko izarraren distira ikusiko dute gaur gauean Anoetan.

NEREA LIZARRALDE

Iritsi da eguna. Bruce Springsteenen jarraitzaileek denbora asko daramate momentu honen zain. Ordu gutxi falta dira eta irrikitan daude denak... eztarria urratzeko, kamiseta bustitzeko eta bi orduz Springsteen eta bere bandaren parte sentitzeko.

Ba al da inor bizirik hor?

40.000 zale inguru dena emateko prest agertuko dira gaur Anoetan. Rockaren piztiaren orroa entzuten hasi dira dagoeneko. The Boss-ek «Is There Anybody Alive Out There? (Ba al da inor bizirik hor?)» deiadar ezaguna egiten duenean hasiko da gau magikoa. Bruce Springsteen eta The E Street Bandaren rock ikuskizun magikoa.

Aparteko ibilbidea

Poesiaz beteriko baikortasuna eta esperantzaren aldeko himno zahar eta berriak daude Springsteenen errepertorioan. Amerikar ametsaren ezkutuko aldea begi bistan uzten duten horietakoak, noski. Estatu Batuetako kaleetako borroka eta biziraupen istorioak kontatzen hasi zen Darkness on the Edge of Town diskoan. Hura izan zen bere aurkezpena. The River bilduman rock indartsu eta lazgarriagoa egin zuen, Nebraskan melodia zintzo eta sakonak eta The Tunnel of Loven bere alderik erromantikoena erakutsi zuen. Born In The USA diskoarekin lortu zuen nazioarteko ospea eta rockaren izar bihurtu zen 80. hamarkadan, herri kulturaren sinbolo eta figura.

'Magic'-ekin itzulera energiko eta indartsua

The Rising diskoan rock gogor eta puruarekin itzuli egin zen. Lan ilun eta tristeenetakoa omen da Irailaren 11 New Yorkeko atentatuen eraginpean idatzi baitzituen lan honetako letrak. Iaz, ordea, Magic bilduma argitaratu zuen eta bere musika inoiz baino biziagoa eta indartsuagoa dagoela erakutsi zuen.

Springsteen erdipurdiko ikaslea izan zen eta unibertsitatetik bota zuten intelektualki ezgai omen zelako. Musikan izan duen anbizioa bere aitaren porrotaren aurkako erreakzioa izan dela onartu du artistak: «Aita ozpinduta bizi zen fabrikako lana eta familia aurrera atera ahal izateko egin behar izan zuen esfortzuagatik». Bob Dylan miresten du «bere erantzun propioak bilatzen dituelako eta sekula ez duelako bide komertzialetik tira egin».

Rockaren piztia

16 urterekin musikan hasi zenetik aparteko ibilbidea egin du Springsteenek eta jarraitzaile amorratu eta fidelak izan ditu hasieratik. 58 urte bete ditu aurten eta inork ez du zalantzan jartzen The Boss-en grina sutsua.

Duela zortzi hilabete Bilbotik pasatu zen Bruce urakana eta zur eta lur utzi zituen han bildutakoak. Orain Donostiaren txanda izango da. Rockaren zurrunbiloak harrapatuko ditu Springsteen zale guztiak.

 

 

 

 

 

PATTI SCIALFA

Ahotsa eta gitarra

Springsteenen emaztea da eta hiru seme alaba izan dituzte elkarrekin. 1984an hasi zen E Street Bandan. Rolling Stones taldearekin kolaboratu izan du eta bakarkako hiru disko argitaratu ditu.

 

CHARLES GIORDANO

Teklatua

Apirilean 40 urtetan zehar Springsteenen lagun eta kide izandako Danny Federici hil egin zen. Bere ordez Brucekin The Seeger Sessions Band-en izandako Charles Giordano da bere ordezkoa.

 

NILS LOFGREN

Gitarra

Neil Youngen bandako kide izan da 17 urte bete zituenetik. 1984an E Street Bandako kide bihurtu zen Born in the USA birarako. Bakarkako ibilbide luzea ere egin du Lofgrenek.

 

MAX WEINBERG

Bateria

Weinberg 1974an hasi zen bandarekin prentsan iragarritako iragarki bati erantzun zionean. Springsteenekin ez dagoenean Conan O´Brien-en Talk Showko bandako musikaria da.