Irutxuloko Hitza

ASIER MAEZTU ð- Txirrindularia

Txirrindularitza

Bigarrenez parte hartuko du Asier Maeztuk Olinpiar Jokoetan; aurrekoetan, Atenasen, domina eskuratu zuen jazarpen proban.

raul perez

Lau urte igaro dira Atenasko Olinpiar Jokoetatik. Brontzezko domina irabazi zuen, orduan. Ordutik hona baina, gauzak ez zaizkio nahi bezain ondo atera. Federazioaren akats batengatik Munduko Txapelketatik kanpo, ebakuntza bat...

Duela lau urte domina etxeratu zenuen. Hori Beijing-en hobetzea zaila, ezta?

Zaila da, bai. Atenasera joan aurretik Munduko Txapelketan hirugarren sailkatu ginen eta aurten zazpigarren izan gara. Horrek zerbait esan nahi du. Urteotako ibilbidea okerragoa izan da, arazoak izan dira, hautatzaile aldaketa...

Gogoan al duzu oraindik Atenasko lasterketa?

Ahaztu egiten da, baina une batzuetan gogoratzen naiz, batez ere kazetarien deiak iristen direnean. Oso oroitzapen goxoak dira. Gustatuko litzaguke duela lau urtekoa errepikatzea. Badugu dominetatik gertu egotea, baina... Danimarka eta Zeelanda Berria, adibidez, indartu egin dira.

Non duzu gordeta domina?

Gordeta dut, bere kaxan. Marko batean jarri nahi nuen, baina azkenean ez nuen jarri. Denbora luze igarotzen dut domina kaxatik atera gabe. Gogoan dut eta ez dut ikusteko beharrik. Egunen batean leku aproposean jarriko dut.

Zeintzuk izango dira zure taldekideak Beijing-en?

Sergi Escobar, David Montaner, ToniTauler, Antonio Miguel eta bostok osatzen dugu taldea. Carlos Torrentek taldean behar zuen, baina eroriko txarra izan du eta ez du parte hartzerik izango. Giltzarria zen guretzat, eta beraz izorratu gaitu. Bizitza horrela da.

Zeintzuk dira talde indartsuenak?

Britainia Handia da, ezbairik gabe, faboritoa. Giroan ibilitako Cavendish eta Wiggins txirrindulariak dituzte taldean. Australia da irabazteko beste hautagaia; Atenasen urrea irabazi zuten. Herbeerehak, Frantzia eta Ukraina ere dominetako lehian ibiliko dira.

Ezagutzen al duzu Beijing-eko belodromoa?

Abenduan egon ginen eta primerakoa da. Harrituta geratu ginen. Zezen plaza edo plater hegalari baten itxura du.Ondo egina dago, egurra oso ona da eta ondo klimatizatuta dago. Tenperatura altua eta hezetasun baxua bada oso denbora onak izango dira. Kontua da uda oso garai hezea dela Beijing-en eta euria egun askotan botatzen duela.

Atenas eta Beijing-en arteko lau urteak ez dira onak izan zuretzat.

Ez dira onak izan. 2004a oso ondo bukatu genuen, Manchesterren zilarrezko domina lortu genuen Munduko Kopan. 2005a oso ondo zetorren, baina dena okertu egin zen. Espainiako federazioaren hankasartze batengatik, Munduko Txapelketatik kanpo utzi gintuzten. Australiak ez zuen txapelketa horretara joan behar, eta beraz, sekulako aukera galdu genuen zilarrezko domina irabazteko. Sekula ez dugu aukera hori berreskuratuko. Hura eta gero, aldaketak etorri ziren, tartean hautatzailearena eta aldaketok txarrerako izan ziren. 2006an ebakuntza egin zidaten, eta iaz ere Munduko Txapelketa ez zen ondo atera.

30 urte dituzu. Olinpiar Jokoetara joateko azken aukera dela uste al duzu?

Ez, ez. Hurrengoetara iritsi nahi dut. Disfrutatzera noa Beijing-era, baina hau ogibidea dela ahaztu gabe, gure soldata dago jokoan. Lau minutuko proba batean dena jokatzen dugu, hortaz presioa izugarria da. Niri kanpoko presioa bost axola zait; nork bere buruari jartzen dio presioa. Nik etxebizitza ordaindu behar dut eta familia aurrera atera.