Irutxuloko Hitza

Hitzarmena

Kiroletako Udal Patronatuak eta Gipuzkoako Futbol Federazioak 12 urterako hitzarmena sinatu dute.

erredakzioa

Odon Elorzak eta Juan Luis Larreak 12 urterako hitzarmena sinatu zuten atzo. Alkateak Donostiako Kiroletako Udal Patronatuaren izenean, Donostia Kirolak, sinatu zuen, eta Larreak Gipuzkoako Futbol Federakuntzako presidente bezala. Akordioari esker hiriko zenbait futbol zelai berrituko dituzte, eta beste bi berri eraikiko dituzte.

Herrera, Matigoxotegi, Martutene, Cesar Benito eta Berioko futol zelaietan futbol federatuko partiduak jokatzen dituzte. Hitzarmeneko bi aldeek belar artifizialeko zelai horien eta berrien eraikuntza, hobekuntza, antolakuntza eta erabilera arautuko dute. Akordioa sinatu duten bi aldeei egokia iruditzen zaie aipatutako futbol zelai horiek lehentasunez erabiltzea futbol federatuak dituen beharretarako. Hala, zelai horiek baldintza onetan egoteaz arduratuko dira. Beharrezkoak diren hobekuntza eta egokitzapenak egingo dituzte horretarako.

Hitzarmenaren arabera, Berioko zelaiko belar artifiziala aldatuko dute eta Matigoxotegiko zelaiko aldagelak guztiz berrituko dituzte. Era berean, sinatzaileek konpromisoa hartu dute hiriko kluben egiturak sendotzen laguntzeko, antolaketa eta diru aldetik egingo lukete laguntza. Bestetik, Gipuzkoako Federazioak partidu ofizialak jokatzeko edo entrenamenduak egiteko zelai horietan ordua eskatzeko eskubidea izango du. Hala, Gipuzkoako hainbat mailatako selekzioek jokatuko dute, beti ere zortzi eguneko aurrerapenarekin eskatzen badute.

Loiolan zelai berria

Datozen urteetan zelai berriak sortzeko beharra ere egongo dela arreikusi dute, eta hitzarmena sinatzerakoan kontutan izan dute. Orain erabilgarri dagoen zelairen bat beste batengatik ordezkatuko dutela ere esan dute.

IRUTXULOKO HITZAk aurreratu zuen bezala, Loiolan zelai berri bat eraikiko dute. Frontoia eta Ur-Kirolak arraun elkartearen eraikinaren artean egingo nahi dute zelai berria.

Bestetik, Martutene eta Herrerako futbol zelaiak beste batzuengatik ordezkatuko dituzte. Martutenekoa Antodegira pasako da, eta Herrerakoaren ordez LauHaizetakoa egingo dute. Hala, lau urteren buruan bi zelai berri egiteko asmoa dute, Loiolakoa eta Lore-Tokikoa, Añorga inguruan.