Irutxuloko Hitza

Zaborrak

Ezker Batua Aralar koalizioak eta PPk aurka bozkatu dute, hala ere proiektuak beharrezko botuak lortu ditu.

e.z.

Atzoko Udaltzabatzarrean Zubietan Errauskailua egitea onartu zuten. Ezker Batua eta Aralarrek osatutako koalizioak eta PPk ezezko botoa eman zuten. Gainerako alderdiek proiektuaren alde egin zuten, eta gehiengoa lortu zuten.

Proiektuak ukituko dituen lurrak gutxiago mugitzeko irtenbidea aurkitu dutela esan zuen Jorge Letamendia hirigintza zinegotziak. Plataforma egiteko hasiera batean kalkulatutakoa baino heren bat gutxiago mugituko dituzte lurrak Letamendiaren esanetan.

PP arduragabetzat jo dute

Errauskailuarentzat toki egokiena Landarbaso dela uste dute PPkoek, horregatik eman zuten ezezko botoa. Kontu horretan PPren jarrera guztiz arduragabea izan dela esan zuen Denis Itxaso ingurumen zinegotziak. EAJko Xabier Ezeizabarrenaren hitzetan PP proiektuaren alde eta aurka ibili da denbora guztian. Javier Urbistondo PPko zinegotziak alderdiaren jarrera azaldu zuen. PPk beti jarrera bera izan duela esan zuen. «Errauskailua Landarbason nahi dugu, baina hori bozkatu genuenean beste baldintza batzuk onartu behar genituen baiezkoarekin».

Duñike Agirrezabalaga EB Aralar koalizioko bozeramaileak azaldu zuen beraiek beti egin dutela proiektuaren aurka. «Zubietan errauskalurik ez». Bere ustez, «EAJk proiektuaren alde egiten du eta gero kalteak zuhaitzekin estali nahi izan ditu».