Irutxuloko Hitza

Zinemaldia

Michael Winterbottom hirugarren aldiz izango da Zinemaldian; 'Genova' drama aurkeztuko du.

erredakzioa

Michael Winterbottom ingelesa, Hirokazu Kore-eda japoniarra, Samira Makhmalbaf iraniarra, Yesmin Ustaoglu turkiarra eta Javier Fesser eta Belen Macias espaniarrak aurtengo Sail Ofizialean lehiatuko dira, Zinemaldiak jakitera eman duenez . Zuzendariok aurretik iragarritako Daniel Burman, Christophe Honore, Kim Ki-duk eta eta Jaime Rosalesekin lehiatuko dira Urrezko Maskorra etxeratzeko.

Genova (Michael Winterbottom). Hirugarren aldiz etorriko da Zinemaldira Michael Winterbottom. 2004an Nine Songs aurkeztu zuen eta 2005ean A Cook and Bull Story ekarri zuen. Winterbottomen beste bi film Gailurren atalean pantailaratu dituzte 24 Hour Party People (2002) eta Code 46 (2003). Genova filma izen bereko hirian girotuta dago, eta aita batek eta bere bi alabek amaren heriotzari nola egiten dioten aurre kontatzen du. Colin Firth aktoreak jokatzen du rol nagusia.

Camino (Javier Fesser). Hainbat osagai nahasi ditu Fesserrek Camino pelikulan: familiako drama, kontakizun magikoak eta erlijioarekiko debozioa. 11 urteko neskato bat da protagonista. Nerea Camacho, Carmen Elias, Mariano Venancio eta Manuela Velles aktoreek jokatzen dituzte film honetako rol nagusiak. El Milagro de P. Tinto (1998) eta La gran aventura de Mortadelo y Filemon (2003) dira Fesserrek aurretik egindako lanetako batzuk.

Aruitemo, Aruitemo (Hirokazu Kore-eda). Drama familiarra irudikatu du Hirokazu Kore-eda japoniarrak. Familia bateko kideak elkartuko dira, semeetako baten heriotzaren hamabosgarren urteurrenean. Betiko etxera bueltatuko dira eta amak betiko otordua prestatuko die, baina urteen poderioz bakoitzak izandako aldaketak agerian ez gelditzea saihestezina izang da. Oroitzapenak, frustrazioa ... Sentipen azaleratuko dira.

Two-Legged Horse (Samira Makhmalbaf). Sakrifizioa eta maitasuna partekatzen dituzten bi pertsonaiaren istorioa ekarriko du Makhmalbaf iraniarrak. Filma Afganistanen grabatu zuten 2007an eta lanean ari zirela sei zauritu izan ziren atentatu baten ondorioz.

Pandora´x Box (Yesim Ustaoglu). Istanbulen galduko den amona baten inguruko filma da Pandora´s Box. Familia harremanetan murgildu da Yesim Ustaoglu turkiarra. Laugarren filma du Ustaogluk. Beste bi filmerekin ¬Gunese Yolciluk eta Bulutlari Bekleren¬ sari ugari jaso ditu Turkiako zinema zuzendariak.

El patio de mi carcel (Belen Macias). Candela Peña, Blanca Portillo, Veronica Etxegi, Ana Wagener eta Patricia Reyes preso dauden bost emakumeren larruan ari dira . Antzerki taldea sortuko dute kartzelako egonaldia samurtzeko. Maciasen lehen film luzea da.