Irutxuloko Hitza

Kontzertua

Lou Reed ordezkatzera etorri zen Bobby McFerrin eta bere emanaldiak ikusmin handia sortu zuen.

nerea lizarralde

Azken momentuan lotutako emanaldia izan da eta Jazzaldian ikusmin gehien piztu duena. Bobby McFerrin eta Donostiako Orfeoiaren kontzertua. Ostegunean Orfeoiaren egoitzan entsegu txiki bat egin ondoren atzo Zurriola hondartzan jendaurrean musika klasikoa, jazz eta eta Afrikako erritmoekin inprobisatutako saioa eskaini zuten.

Ahotsaren akrobatatzat dute Bobby McFerrin. Abeslari izateaz gain, orkestra zuzendaritza ikasketak egin ditu. 40 urte bete zituenean San Francisco-ko Orkestra Sinfonikoa zuzendu zuen eta harrez gero munduko hainbat orkestrekin lan egin du: «Ustekabean hasi nintzen zuzendari lanean. Nire urtebetetzea ospatzeko modu polita iruditu zitzaidan eta esperientzia hura asko gustatu zitzaidan. Oso gustura sentitu nintzen», azaldu zuen McFerrinek.

Nazioarteko izar bihurtu zuen Don´t Worry Be Happy abesti ezagunaz nazkatuta dagoen galdetu zion kazetari batek baina McFerrinek ezetz esan zuen: «20 urteetan ez dut abesti hori sekula jo zuzenean. Osorik ez, behintzat. Kantuaren doinu batzuk eta beste pieza batzuekin tartekatuta, beharbada bai».

McFerrin Keith Jarretten kontzertuan izan zen eta pianojoleak publikoa isilik egoteko duen apeta geroz eta hobeto ulertzen duela esan du: «Entzutea desagertzen ari den artea da. Ez diogu ez geure buruari ez gure ingurukoei entzuten. Zuzenean ari naizenean jendeak nire musika entzutea gustatzen zait. Musikaren alderdi espirituala ere galtzen ari da eta pena izugarria da».