Irutxuloko Hitza

Futbola

Vaughan, Stevanovic eta Rivas ez dira gainontzekoekin aritu, taldeak haiek beste talde batera joatea nahi duelako.

erredakzioa

Hiru egunetan zehar proba fisikoak egin ondoren Realeko lehen taldeko jokalari guztiek elkarrekin egin dute lehenengo entrenamendua Zubietako zelai nagusian. Juanma Lilloren aginduetara egin zuten atzo goizean lehen entrenamendua elkarrekin.

Oraindik iritsi ez diren jokalariak falta ziren saioan, baina entrenamenduan zegoen baten batek ere agian ez du jarraituko taldean.

Marcos eta Rodriguez, berriak

Lehen taldearekin arituko diren jokalarien artean, bi aurpegi berri ikusi ahal izan ziren. Marcos Garciak eta Sergio Rodriguezek haien taldekideak ezagutu ahal izan dituzte eta Lillok emandako lehenengo hitzaldia entzun behar izan zuten.

Zelaira atera bezain laster, 20 minutuko hizketaldia eman zien Tolosako entrenatzaileak beren jokalariei. Besteak beste, joko kolektiboaren garrantzia azpimarratu nahi izan zuen Lillok. Bakarkako jokoak talde baten barruan egiten bada eragina duela esan zien Lillok bere jokalariei.

Urteko lehenengo diskurtsoaren ondoren, lanean jarri zituen jokalariak Lillok. Iazko ohiturak ez ditu albo batera utzi eta baloiak izan du nagusitasuna egindako ariketetan.

Sansetik igotako bost jokalari izan zituen bere esanetara Lillok: Zubikarai ¬badirudi lehen taldearekin jokatuko duela aurten Bravo edo Riesgo saltzen badute¬, Alex Albistegi, Balentziaga, Viguera eta Sio. Lillok aste honetan esan zuenez, Sanse «oso gertu» izan nahi du denboraldi guztian zehar beharra badago bertako jokalariak, erabiltzeko. Lehen entrenamendua bukatzeko zelai osoan partida antolatu zuen Lillok. Iaz egin ohi zuen bezala, Iñigo Dominguezek eta Raul Canedak zuzendu zituzten jokalarien ariketak. Partida, jokalari guztiek nahastuta jokatu zuten eta nabarmentzekoak izan dira Marcosek eta Xabi Prietok egindako zenbait jokaldi. Morten Skoubok ere golak sartzen ez zaiola ahaztu erakutsi zuen.

Fitxaketak eta besteak

Juanma Lillok beste jokalariren bat ekarri nahi du Realera. Aurrelari baten bila dabiltzala onartu zuen. Esperientziadun erdiko atzelari bat ere fitxatu nahi dute. Ivan Campo donostiarrak du aukera gehien etortzeko, baina oraindik elkarrizketek luze jo dezaketela dirudi. Levanteko Geijo aurrelariaren atzetik ere dabil talde txuri-urdina, baina Levanten duen fitxa oso altua da Konkurtso Legean murgilduta dagoen Realarentzat

Baina agian zailagoa izango da Lillok nahi ez dituen jokalariak beste talderen batera bidaltzea. Rivasek, dirudienez, uko egin zion Ingalaterrako talde batekin proba egiteari. Badirudi, Sevillak fitxatu nahi duela espainiarra.

Vaughan ia ziur Blackpoolera joango da jokatzera, eta Dalibor Stevanovicek ez du oraingoz inongo eskaintzarik jaso eta agian Esloveniara itzul daiteke.