Irutxuloko Hitza

Zaldi lasterketak

Zaldiak trosta bizian hasi aurretik ikusi, apustu egin, harmailetara joan eta apustu gunean aukeratutako zaldiaren alde oihuka egin... Hori guztia izaten da hipodromoan udaran igandero.

raul perez

«Eman Dubai!», oihukatu du gaztetxo batek, zaldiak Bugatiko bihurgunea pasatu eta azken zuzengunean sartu direnean. Dubai da faboritoa adituen ustez, eta ondorioz ikusle askok jokatu dituzte sosa batzuk haren alde. Azkenean baina, Dubaik ez du irabazi; Urdaburu izan da azkarrena. Harmailetan, zalaparta. Batzuk pozik, eta beste batzuek eskuak burura eraman dituzte, atsekabetuta.

Igandero sei lasterketa izaten dira eta beraz sei aldiz ikusten dira antzeko irudiak. Segundo gutxitan, zirrara handia. Minutu eta erdi inguru irauten dute zaldi lasterketa gehienek, nahiz eta badira bi minutu eta erdira iristen diren lasterketak ere.

Dena dela, arratsalde pasa Donostiako hipodromora joateak askoz gehiagorako ematen du. Esate baterako, lasterketa bakoitzaren aurretik eta ondoren izaten da zaldiak ikusteko aukera. Paddockean zenbait bira ematen dituzte, zaleek ikus ditzaten minutu gutxiren bueltan lehiatuko direnak. Eta lasterketa bukatuta, beste pista batean ere izaten dira tartetxo batez, hauspoa ederki berotu eta gero, bere onera itzultzen.

Apustuak, bizigarri

Harmailen azpian ere badago mugimendu handia, bereziki lasterketak hasi aurretik. Apustuak egiteko gunea da. Bertan dago lanean Dani Peña herreratarra, lehen urtez, «kasualitatez». «Batzuei apustuen gaineko informazioa eman behar izaten diegu, eta beste batzuei, ordea, ez, adituak direlako», dio Peñak. Eta zaldia aukeratzeko orduan ere aholkurik eskatzen al diete? «Guk, eman ez dugu ematen, azken batean, nork bere dirua jokatzen baitu». Lankide asko ditu Peñak, apustuak egiteko toki asko dagoelako. Beraz estuasun handirik ez dute pasatzen, nahiz eta lasterketak hasi aurreko minutuetan ilarak sortzen diren. Estuasunik ez, baina ikuskizunarekin gozatzeko aukera ere ez, lasterketak bizkarrez dituztelako.

Askok Peña eta bere lankideengana jotzen dute apustuak egiteko, baina berrikuntzak zaldi lasterketetara ere iritsi dira eta badira zenbait ukipen pantaila, nork bere kabuz nahi duen apustua egiteko.

Hipodromoaren kudeatzailea, oraingoz gustura

Pello Urtasun hipodromoko gerentea hara eta hona ibiltzen da lasterketa egunetan: harmailetan, garaikurrak ematen dituzten tokian... Orain arte jokatutako azken jardunaldian zaldien salerosketan diharduen klub bati egin behar izan zion harrera.Oraingoz denboraldia ondo doala dio. «Lehen eguna oso polita izan zen, baina azken lasterketa bertan behera geratu zen, pista bustita zegoelako eta horrek giroa pixka bat hoztu egin zuen. Bigarren jardunaldia oso ondo joan zen, eta hirugarrena, ere bai. Bestalde, Pottok musiketan ikuskizunean, uztailaren 25ean, 1.500 ikusle inguru izan genituen».

Ohi bezala, uda denboraldiak abuztuaren 15ean goia joko du, Urrezko Koparekin. Hala eta guztiz ere, ordura arte izango da zaldi lasterketekin gozatzeko aukera gehiago. Lehena, abuztuaren 3an 17:30etik aurrera.