Irutxuloko Hitza

Euskal Jaiak

50 postutan 10.000 sagardo litro banatuko dituzte eta txorizoa, bakailu tortila eta gazta ere egongo dira.

erredakzioa

Sagardoaren txinparta, neurrian, aparta! da aurtengo sagardo festaren leloa. XXIII. Sagardo Eguna ospatuko da, Euskal Jaien barruan ekitaldi jendetsuenetakoa. Guztiek egun atsegina izatea nahi dute antolatzaileek, baina neurriz edateko aholkatu dute, «ez da mozkortzeko egun bat. Sagardoa gozatuz dastatu behar da», aipatu du Arantxa Eguzkiza sagardogile elkarteko presidenteak. 6.000 edalontzi inguru salduko dituzte, 50 sagardogilek izango dituzte postuak arkupetan eta 10.000 sagardo litro inguru banatuko dituzte.

11:00etan hasiko da dastaketa, baina ohikoa baino ordu laurden lehenago bukatuko da, 13:45ean. Hala, antolatzaileek guztia jasotzeko denbora gehiago izango dute. Sagardoa dastatzeaz gain, txorizo egosia, bakailu tortila eta gazta dastatzeko aukera egongo da. Bestetik, Estanga anai arreba trikitilariek, Sebastian Lizaso eta Beñat Gaztelumendi bertsolariek, eta Mikel Ugarteren txalapartariak girotuko dute festa.

Edalontziarekin informazioa

Urtero bezala, 13:00etan dastaketa etengo dute eta omenaldiari ekingo diote. 65 urte bete dituzten, hau da, erretiroa hartzeko adinera iristen dituzten sagardogileak omenduko dituzte ohiturari jarraituz eta aurten bost izango dira omenduak: Igeldoko Jose Cruz Kalonje, Hernaniko Itxas-Buruko Ascensio Intxauspe, Zeraingo Otatzako Ramoni Lopetegi, Astigarragako Mendizabal sagardotegiko Juan Mendizabal, eta Oiartzungo Aristizabalgo Lurdes Portugal.

Konstituzio plazan aurtengo leloa duten kartelak jarriko dituzte, eta, hiru euroren truke, basoa erostean sagardoaren inguruko eskuorri informatiboa banatuko dute. Botilako sagardoa nola zaindu, nola zerbitzatu eta nola dastatu behar den azaltzen du orriak. Gomendioen arabera, sagardoa fresko edan behar da eta zurrutada batez edango den sagardo kopurua soilik zerbitzatu behar da.