Irutxuloko Hitza

Jardunaldiak

Emakumeen Aurkako Indarkeriaren Nazioarteko Eguna izango da azaroaren 25ean.

i. lopez

Azaroaren 25ean izango da Emakumeen Aurkako Indarkeriaren Nazioarteko eguna eta horren inguruan Udaleko Berdintasun Sailak egitaraua antolatu du. Zenbait erakunderekin batera antolatu du Udalak egitaraua: Amnesty International, Garaipen, EHU, Garraldi Donostiako Koordinadora Feminista eta SOS Balkanesekin. Ainhoa Beola zinegotziak azaldu zuenez, krisi garaietan bizi izaten den «indarkeri ekonomikoa» saihestea da aurtengo ekitaldien asmoa. «Indarkeria mota hau emakumeek gehiago pairatzen dutela demostratuta dago, hortaz, hau ezabatzea izan behar da gure helburua» azaldu zuen Beolak.

Azaroaren 17an izan zen lehenengo ekitaldia eta 28ra arte, hitzaldiak izango dira emakumeek jasaten duten indarkeriaren inguruan. Honez gain, 24ean Kalean uso, etxean otso antzezlana eskainiko dute Victoria Eugenia Antzokiko Klub aretoan.

Hiriko etxebizitza eta denda guztietara puntu morea duen kartela bidaliko dute Udalaren ordezkariek, eta azaroaren 25ean etxeko leihoetan eta dendetako eskaparateetan jartzeko deia egin dute.

Bosniako emakumeak, hirian

Sarajevoko (Bosnia-Herzegovina) Zena Zrtava Rata elkarteko bi ordezkari izango dira Donostiako jardunaldi hauetan. Emakume hauek Bosniako gudan bortxatuak izan ziren eta elkarte hau sortu dute beraien eskubideak babestu ahal izateko. Elkarteko emakumeek hitzaldiak emango dituzte azaroaren 24 eta 27an.