Irutxuloko Hitza

Hirigintza

Lursail hori birkalifikatzearen truke, Kutxak 175.000 euro emango dizkio Victoria Eugenia Antzokiari.

ion lopez

Onkologikoaren eraikin zaharrean etxebizitzak egin ahal izateko hitzarmena sinatu dute Udalak eta Kutxak. Odon Elorza alkateak eta Xabier Iturbe Kutxako presidenteak Hiriko Plan Orokorra aldatzea behartuko duen hitzarmena sinatu zuten atzo. Onkologiko zaharraren lursailak 12.990 metro karratu ditu.

Kutxak etxebizitzak egitearen truke, zenbait konpromiso hartu ditu. Besteak beste, Victoria Eugenia Antzokiaren programazioa indartzeko 175.000 euro emango ditu urtero. «Neurri hau dela eta, Victoria Eugeniako eta beste zenbait antzokietako sarrerak ez ditugu igo behar izango, eta agian zenbait kasutan jaitsi ahal izango ditugu», esan zuen Odon Elorza alkateak.

Bestalde, Kutxak Lau Haizetako Merkear modulutik 62.074 metro karratuko lursaila emango dio, bertan gaur egungo Herrerako futbol zelaiaren ordezkoa izango dena eraikitzeko. «Gaurkoa oso egun pozgarria da guretzat. Onkologikoa hirian asko maite den erakundea da eta hemendik aurrera are eta eraginkorragoa izango da Donostia Ospitalearen alboan eraikitzen ari diren eraikin berri eta modernoan», azaldu zuen Elorzak.

Fusioa «egingo da»

Xabier Iturbek azaldu zuenez, onkologikoaren eraikin berria 2009ko urtarrilean inauguratuko dute ziurrenik. «Urtarrilerako prest egongo dela uste dut».

Kutxa eta BBKren arteko fusioari buruz galdetuta, 28an egingo den batzarrean «fusioa onartu egingo dela» esan zuen Iturbek. «Azkarregi goazela diotenei esango nieke, munduak hartu duen erritmoarekin alderatuta, oso mantso goazela. Beharrezkoa da fusioa egitea».