Irutxuloko Hitza

Euskara

500 produktutik gora biltzen duen gida argitaratu du Euskararen Udal Patronatuak hirugarren urtez.

erredakzioa

500 produktutik gora biltzen ditu Euskararen Udal Patronatuak Gabonen aurretik argitaratu duen Euskarazko Produktuen Gida 08/09ak. Gida honek, merkatuan aurki daitezkeen euskaraz ekoiztutako kultur eta aisialdiko produkturik berrienak eta interesgarrienak jasotzen ditu eta tresna lagungarria izatea nahi du Gabonetako erosketak egiteko garaian.

Ainhoa Beola euskara zinegotziak azaldu zuenez, «gero eta arrakasta handiagoa du gida honek eta gero eta herritar gehiagok erabiltzen dute Gabonen aurretik opariak egiteko. Euskarazko produkzioa gero eta zabalagoa da. Aurten, adibidez, aurreko urtekoa baino zabalagoa izan da. Horregatik, gida honek erraztasunak ematen dizkio urteko berrikuntzak ikusi nahi dituen pertsonari».

Euskaraz gozatzeko era guztietako eta eta adin guztiei zuzendutako produktuak jasotzen ditu gidak zortzi ataletan banatuta: aldizkariak, komikiak, DVDak, jokoak, CD-romak, musika, liburuak eta hiztegiak.

513 produktu

Guztira, 69 argitaletxeren eta ekoizleren 513 produkturen berri ematen da gida honetan. Gidaren azkeneko atalean, autoikaskuntza bidez euskara ikasteko dauden aukeren eta argitalpenen berri ere ematen da eta, amaieran, gidan agertzen diren produktuen argitaletxe eta ekoizleekin batera Donostiako saltokien berri ere ematen da.

Guztira, gidaren 30.000 ale argitaratu ditu eta hainbat tokitan banatuko dituzte.