Irutxuloko Hitza

Argitalpena

Beste artista eta musikarien proiektuetan ibili eta gero, 'Cosmonaut Camel' diskoa bakarka sinatu du.

NErea lizarralde

Jimmy Bidaurreta (Donostia, 1971) ohiko izena da Euskal Herriko jazz, funk, musika elektronikoa edo latinoarekin lotutako proiektuetan. Ibilbide honetan beste urrats bat eman du eta musika etnikora gerturatu da bere bakarkako lehen diskoan: Cosmonaut Camel. An ethnictronic trip world.

Garapen teknologikoak herriak eta kulturak hurbiltzen dituen ustea du Bidaurretak. Ideia hori musika sorkuntzaren eremura eramanez eta Do it yourself ¬zuk zeuk egin¬ filosofia bere eginez, tradizio kultural zaharrenetakoa duten herrietara bidaia proposatzen du Bidaurretak. Soinuen collage honekin India, Maroko, Chicago edo Latinoamerikako herrialdeetara eramango ditu entzuleak.

Garestia merke egiten

Parte hartu duen proiektu guztietan ohikoak izan diren funk, acid jazz edo musika latinoarekin batera, kultura hindu eta arabiarraren osagaiak erabili ditu. Ekoizpen lan handi baten ondoren abesti melodikoetan moldatu ditu. Melodiak ez ezik, beat elektronikoekin eta piano jazzistikoarekin sortutako kontraste biziak, hip hopa, pieza sentsualak edo funk pieza dantzagarriak ere badira.

Samplerrak hartu eta askotariko soinu horiek musika bihurtu ditu Bidaurretak. Munduko musikak batidoran sartu eta soinu elektronikoekin diskoa osatu du. «Etxean nik bakarrik eta teknologiarekin egin dut. Elementu desberdin asko sartu nahi nituen eta musikari gehiagorekin lan egin izan banu nire ahalmenetatik kanpo dauden baliabideak beharko nituzke. Teknologiari esker, oso garestia izango litzatekeena merke egin daiteke», azaldu zuen atzo diskoaren aurkezpen prentsaurrekoan.

«Horrek ez du esanahi, noski, lan gutxiago egin behar denik. Taldeekin lan egitera ohituta nago eta izugarri disfrutatzen dut taldean jotzen, baina hau esperientzia desberdin bat da. Gogoa nuen horrelako zerbait egiteko», erantsi zuen.

Buruan zuen ideia

Aspalditik buruan zuen ideia errealitate egin ahal izan du donostiarrak disko honetan: «Betidanik interesatu zait musika etnikoa, baina ez dut inoiz aukerarik izan ezer egiteko. Musika ezberdinak elkartu eta emaitza koherente bat lortu nahi nuen. Ez nuen fusio erraza egin nahi. Mundu zabaleko musika guztiak entzuten ditugu egun eta gero eta ohiakoagoa izango da eragin asko dituen musika egitea».

2004an hasi zen Cosmonaut Camel-eko lehenengo piezak sortzen. Ez zekien zer gertatuko zen abesti horiekin, baina azkenean proiektuarekin jarraitu eta teknologiarekin, hau da, software tresnekin, samplerrekin lan egiten hasi zen. Edizio lan handia izan dela aitortu du. «Esperientzia izaugarria izan da tresna berri hauek ezagutzea eta horiekin lan egitea. Ekoizpen bitxia izan da», adierazi zuen atzo.

Diskoaren titulua bat batean bururatu zitzaiola dio. «Diskoaren filosofia ondo islatzen duela uste dut. Kultura hindu eta arabiarra oso presente daude lan honetan. Herrialde garatuetan ez dauden tradizio biltegi aberatsak daude han», nabarmendu zuen. «Gogoeta egin nahi nuen tradizioen izaera iraunkorraren eta teknologiaren iraungipenaren inguruan. Diskoaren azalean, alde batetik etorkizunera begira dagoen kosmonauta dago eta bestetik, gamelua, tradizioa edo anzestrala denari begiratzen diona. Puntu surrealista eta harrigarria badu», aipatu zuen.

Ikasketak, Rotterdamen

Donostiako Udal Kontserbatorioan ikasi zuen. Ondoren, Rotterdamera joan zen jazza eta munduko musika ikasketak egitera. Makala edo Javi P3Z musikarien zuzeneko eta proiektuetan parte hartu du. Ortophonk taldeko teklista ere izan zen. Antzerkia eta zinemarako musika lanak egin ditu. Egun, Gasteiz Big Bandeko zuzendaria da. Ez da nolanahiko big banda: Scratchak, Djak eta hip hopa nahasten ditu. Laster kaleratuko dute urte berriarekin batera argitaratuko den hurrengo diskoaren aurrerapen singlea.